Wever-Croes: Oferta di Hulanda pa reduci interes automaticamente, ta parce mas un trampa

ORANJESTAD – “ Pa motibo cu den e articulo proponi ey tabata tin varios referencia cu nos no por a acepta, y cu nan no kier a cambia mas” tabata motibo duna di premier Wever Croes na Tito Laclé di noticiacla.com diabierna mainta riba e hecho cu Aruba a rechasa e oferta di Hulanda manera cu secretario di estado Alexandra van Huffelen a informa Tweede Kamer den un carta e siman aki. Ta trata di “e oportunidad ofreci pa Hulanda, pa automaticamente reduci e tasa di interes pa Aruba, ora cu ainda logra un acuerdo pa un ley di reino unda cu e supervision financiero ta regla y un Landsverordening Aruba financieel toezicht (LAFt) revisa drenta na vigor”.

TRAMPA ENVEZ DI AYUDO 

 Wever a bay mas leu y a duna un ehempel:” Por ehempel cu un rijkswet mester bin (mi no tin aprobacion di Parlamento pa esey y dus mi no por bai di acuerdo cu ne). Y tambe cu nunca mas por papia di kwijtschelding (algo cu Parlamento a pidi pa nos sigui papia di dje)” e mandatario a sigui splica. Segun e mandatario, e oferta di ayudo, ta parce mas un trampa, cu un ayudo. 

AUTOMATICO OF NO

Tambe, segun sra Wever Croes, mientras cu Hulanda ta papia di automatico, Wever a bisa esaki. “E no tabata asina ‘automatico’. Diripiente a bin mas condicion aden. Dus no solamente nos mester yega na e alternativa hybride, pero mester tambe cumpli cu mas condicion cu nos no a bespreek prome” e prome mandatario a sigui splica Laclé. 

LAST MINUTE

Segun sra Wever Croes, mirando cu ta ‘last minute” nan (Hulanda:red)  a bin cu tur esey y mirando cu nan (Hulanda:red) no tabata dispuesto pa cambia algun di e partinan, nos a opta pa laga e “automatisch” ey afo. E tabata parce mas un trampa cu un ayudo” e mandatario a sigui bisa. “ Ademas tin e artikel 6 di wijziging van de overeenkomst. Dus e posibilidad pa cambia e palabracionnan si toch un dia yega na e solucion hybride, tey den e acuerdo. No mas e no ta “automatico””, e ta sigui bisa.  

LOKE SI A CAMBIA

Tabatin cosnan si cu Hulanda a cambia manera cu Aruba a pidi, pues no tur tabata malo. “Y finalmente loke si nan a cambia manera nos a pidi nan, ta cu asina cu nos haya un mihor interes, nos por paga nan y cancela e acuerdo aki. Mi tin cu bisa cu nan a tene cuenta cu varios di nos puntonan den e ultimo versie cual a facilita e proceso pa firma e acuerdo. Mientras nos ta sigui na mesa pa papia di e hybride” e mandatario a finalisa bisando.