Royal Caribbean a cambia Panama Canal pa crucero cu ta inclui Aruba

MIAMI – E compania crucero Royal Caribbean Cruise Lines a dicidi di cambia un crucero basa riba bishita na Panama Canal, pa un crucero den Caribe cu ta inclui Aruba pa 2024. Sigur un bon noticia cu ta nifica cu Aruba ta haya otro bishita no programa anteriormente pa otro aña. Ta trata di e barco crucero Rhapsody of the Seas. Tur esnan cu a boek caba, a keda notifica.  

CAMBIO DI PANAMA CANAL

E plan tabata pa Rhapsody ofrece un cruise di 7 dia door di Panama Canal cu ta cuminsa y termina na Panama. E tabata un idea nobo pa ofrece un crucero hopi solicita sin mester compromete un crucero di 2 siman. No a duna un motibo specifico pakico a cancela e idea di e crucero ey.  Un email di e compania ta bisa solamente cu ta pa aumenta e experiencia di e turista, a ahusta e itinerario pa e crucero di 16 di maart 2024, unda cu awor lo haci un crucero di 7 dia den e parti sur di Caribe. E barco awor lo pasa Aruba y Curacao, y adicionalmente para na  Cartagena, Colombia. Turistanan cu a boek delanta, tin te dia fin di augustus 2023 pa dicidi si nan ta bay riba e crucero cu ta inclui Aruba of cancela nan crucero completo pasobra nan deseo tabata pa wak canal di Panama.