Awe marduga Parlamento a aproba ley pa cobra BBO na frontera

ORANJESTAD – Cu 11 voto pro y 9 contra, Parlamento a aproba e ley cu ta permiti pa cobra BBO na frontera awe 2 or di marduga. Esnan cu a vota pro ta fraccion completo di MEP y RAIZ, mientras cu esnan cu a vota contra ta AVP, ACCION21, MAS (un miembro ya cu Marisol Lopez tabata ausente), y e dos parlamentarionan independiente Gerlien Croes y Rycon Santos do Nascimento. Despues di 15 ora di reunion, e votamento a tuma lugar. E reunion a cuminsa 2 ora laat debi cu ministernan a drenta den un reunion urgente riba e ultimo cambionan di e ley. Unabez cu esaki a termina, e reunion a cuminsa pa 11’or di mainta. 

NOTABLE

Loke tabata notable tabata e.o. e prome reaccion di parlamentario Setty Christiaans despues di tabata ausente pa motibo di kebrante di salud, y e exigencia di parlamentario Misha Raymond di exigi pa gobierno adapta e pakete basico di AZV pa inclui logopedie tambe den dje, sino e lo sostene e ley. Algo cu e la logra tambe, causando cu Parlamento por a conta cu su voto tambe. Pa loke ta e ley, esaki lo drenta na vigor entrante 1 di augustus proximo. Click AKI pa e ley.