Setty Christiaans ta sigura cu ningun hende a fors’e bin reunion awe pa trata ley di BBO

ORANJESTAD -  “Despues di un siman y mey na cas, ami ta esun cu a acerca bek y mi a bisa mi ta cla pa e reunion aki mi ta cla pa show up na trabou. Ningun hende a forzami” tabata e palabranan di parlamentario Setty Christiaans diaranson mainta, kibrando asina su silencio riba su malesa. E tabata e di dos persona cu a hiba palabra ora cu e reunion a cuminsapa trata e ley di cobransa di BBO na frontera. E la opta pa prome cu bay riba e tema di BBO, pa atende cu su asunto personal ya cu tabatin hopi papia riba e tema aki ultimo luna. “Ningun hende a forzami”, Christiaans a bisa, indicando cu tabata su propio decision pa bin reunion bek awe. “Despues di un siman y mey na cas, ami ta esun cu a acerca bek y mi a bisa mi ta cla pa e reunion aki mi ta cla pa show up na trabou. Ningun hende a forzami”, e parlamentario a sigui bisa. E la remarca tambe cu den 51 aña cu e tin na bida, ta prome biaha cu e la drumi den hospital malo. E la gradici tur hende cu a puntra pe, manda mensahe, pero mas aun esnan cu tabatin’e den nan oracion. Segun Christiaans, esey ta loke ta conta. E la lamenta e hecho cu tabatin hende cu a desea su persona malo y a tende tur tipo di storia riba dje. Incluyendo cu nan lo a bisa cu e ta muriendo y cu lo mester a saca hende for di santana si tabata necesario. E la splica tambe pa loke ta su malesa,  no tin nada malo cu su cerebro y tampoco su boca, sino su pianan. Por a mira su tras, un walker cu ta nifica cu e mester di sosten pa por cana, y a admiti cu e no ta full bon ainda y tin un periodo di recuperacion ainda su dilanti. Tabata algun siman atras cu a cuminsa specula riba su situacion y unda cu tabatin storia cu ta core cu lo mester a reemplaze pasobra e lo mester a keda cas pa un periodo largo. E la pasa dos siman den hospital manera e mes a splica y despues un siman y mei na cas. Y awe e la presenta bek na reunion pa prome biaha.