Opinion: Escasez enorme di trahado den construccion y horeca ta un problema grave pa Aruba su economia

Posted on 06/23/2023 9:42 am AST | Updated on 06/23/2023 9:43 am AST

Scirbi pa Clyde Harms

Aruba ta sufriendo actualmente un escasez enorme di trahado den diferente sector, especialmente den sector di construccion y den horeca. E bashi di trahado ta un problema grave pa nos economia, sigur afectando nos turismo como tambe desaroyo.

AHATA tin un lista cu centenares di vacatura na e diferente hotelnan miembro di e organizacion. Tin un hotel cu ta spera di habri na San Nicolas aki na dos aña y ya nan ta buscando mas di 600 trahado. E gerente di un hotel a declara cu pa e por sobrevivi, e ta bay cera un cantidad di camber pa e por reduci e necesidad di mas trahado. Su ganashi lo ta hopi menos, pero e huespednan lo no por desgaba e hotel ora nan bay bek na nan pais.

E sector di construccion ta experencia e mesun situacion. E mes hotel cu ta busca 600 trahado ta buscando mas di 200 trahado pa e construccion. Frecuentemente contratistanan mester nenga oportunidadnan lucrativo pasobra nan no kier compromete nan mes mientras cu nan no ta sigur cu lo tin trahadonan disponibel. Hopi conract di construccion ta posponi pa falta di trahado.

E pregunta cardinal ta, con por yena e bashi aki? Desafortunadamente, no tin suficiente trahado Arubiano pa yena e bashi, pero tin hopi Venezolano cu ya ta riba nos isla como refugiado of cu tin un status di “iregular” cu ta traha illegal cu lo por yuda.

Remarcabel ta con Gobierno di Aruba ta dispuesto pa duna permiso na inmigrante nobo, pero no kier legaliza e Venezolanonan cu ta riba nos isla caba, dispuesto pa traha pa un mihor bida. Cu e scarsedad enorme di cas pagabel, esaki ta parce mi un politico contra-productivo: Na unda esunnan cu lo bin Aruba ta bay biba? Ta mas logico pa nos uza esnan cu ta riba nos isla caba.

Legalizando e refugiadonan lo ta un acto humanitario cu lo demostra un bez mas e bondad di nos pueblo y e no ta un acto completamente altruista. Aruba su economia tambe lo beneficia. Drentando e mercado laboral legal, e refugiadonan lo paga belasting y contribui na AZV.

Nos pueblo di Aruba semper tabata cla pa yuda caminda cu nan por. Despues di Guera Mundial II nos pueblo a yuda Hulanda. Varios organizacion y scol a organiza actividad cultural, deportivo y musical pa recoge placa pa yuda Hulandesnan. E pueblo di Aruba tambe a yuda Venezolanonan na 1999, tempo cu nan a bira victima di e desaster di La Guayra.

Di nan parti, e Venezolanonan tambe a yuda Aruba den diferente manera. Simon Gollo cu e maestro Abreu na 2006 a duna un concierto gratuitamente na Cas di Cultura cu a produci miles di florin pa Aruba Scholarship Foundation. La Cuadra Venezolana algun aña despues tambe a duna concierto na beneficio di Aruba Scholarship Foundation sin cobra un cen pa nan talento. Tin por lo menos dos Arubiano cu a haci nan estudio universitario na Merca danki na e obra di caridad di e musiconan Venezolano.

Ami mes y mi señora ta disfruta di e trato di mediconan specialisa Venezolano cu definitivamente a hisa e calidad di cuido di salubridad di nos comunidad.

Di 2015 pa 2019 Simon Gollo a organisa e ‘Nuevo Mundo Festival & Academy na Aruba’. Aruba Tourism Authority (ATA) a considera e eventonan aki masha beneficioso pa nos turismo y a honra Simon Gollo pa su decision pa tene e festival na Aruba y no na algun otro isla den Caribe cu tambe tabata anhela di beneficia di tal festival.

Mi ta sigur cu e gentil pueblo di Aruba lo kier yuda e refugiadonan cu a bira victima di e desaster politico cu a forsa 7.5 miyon Venezolano emigra – no, nan a huy di nan propio pais. Gobierno di Aruba, como representante di e pueblo di Aruba, mester trata di yuda caminda cu por.

Un caminda cu por ta pa gobierno implementa e procedura y regulacionnan temporario pa trahadonan cu Departamento di Labor tin cla. Ta parce cu un obstaculo ta e rekisito di algun empleador pa e empleado tin un cuenta bancario caminda e empleador lo deposita su salario, pa no paga cash. Pagamento di salario cash ta duna e empleador mas gasto. Mayoria di e trahadonan aki no tin un cuenta bancario. No pasobra nan no kier, pero pasobra pa habri un cuenta bancario na Aruba ta un caminda di cruz. Hopi rekisito y mas burocracia. E exigencia di algun empleador no mester perhudica tur e otronan.

Mi ta spera cu nos gobierno lo tuma un decision pronto tocante e problema serio aki pa asina nos por evita, of por lo menos alivia, e peliger serio cu ta menasa nos economia.