De Kort: Gobernantenan mester coregi buraconan cu tin den nos leynan actual

ORANJESTAD – Corte recientemente a ‘bati alarma’ y hala atencion di gobernantenan di Aruba, Corsou, St Maarten y Hulanda pa e cantidad di buraconan cu tin den leynan actual y cu mester coregi esaki. Presidente di Corte Comun di Husticia (Hof) mr Mauritsz de Kort recientemente durante un conferencia di prensa, a confirma esaki na prensa y a bisa cu ta spera cu pronto nan lo tende kico e gobernantenan tin pensa di haci cu esaki, durante e proximo Consulta Judicial di e cuater paisnan (Justicieel Vierlanden Overleg). Segun de Kort, tabata aña pasa cu hueznan di tur e 4 paisnan menciona a haci un inventarisacion completo di e deficiencianan den leynan y e buraconan cu tin, y ta spera cu lo e gobernantenan por coregi e saki. 

PROBLEMA

Segun de Kort den su comentario, a admiti cu hueznan diaramente ta confronta cu buraconan den ley cu nan tin cu atende durante casonan cu nan ta trata. “Nan ta confronta leynan cu ta anticua, leynan cu tin buraco aden, y a haci un inventarisacion completo di e situacion” de Kort a bisa. Cada pais tin un lista di ley cu tin buraco aden y cu ta anticua. “Den cierto caso nos a haya te hasta coleganan cu tabata dispuesto pa formula conceptonan di ley pa por yuda cera e buraconan den ley” de Kort a sigui bisa. “Y e deseonan ey nos a entrega na e gobernante, e minister, e parlamentario, na e JVO unda cu e 4 ministernan (di Aruba, Hulanda, Corsou y St Maarten) ta bin hunto. Nos kier nan atencion pa nan coregi e buraconan den e leynan, y nos ta spera cu pronto nos por haya un contesta di kico nan tin pensa di haci cu esaki” de Kort a sigui bisa. Por scucha e comentario di e huez AKI.