Ex minister Paul Croes a raporta na KIA pa sinta su castigo

SAN NICOLAS – Ex minister Paul Croes diamars mainta a raporta na Korectie Instituut Aruba (KIA) pa sinta su castigo di prizon di 3 aña conforme sentencia di corte. Asina e portal 24ora a raporta awe mainta. E mandatario recientemente a perde su ultimo bataya legal ora cu corte di Casacion a rechasa su peticion pa destrui e sentencia dicta contra dje, pa entre otro corupcion cu a haya e nomber Ibis. Esaki a sosode keto keto. Su abogado a informa cu su cliente no a dune autorisacion pa suministra e informacion aki. Asina mes e portal menciona a haya e informacion aki. Segun e portal, esaki tabata su palabranan ora cu e la drenta prizon:” “Mi ta carga mi responsabilidad cu un mente y curason trankil. Como esun responsabel pa tur cos cu ta encera un ministerio di gobierno, ami ta esun cu mester carga e responsabilidad aki. E periodo aki mi lo uz’e pa enfoca riba cosnan positivo cu mi por saca for di e momento pisa aki den mi bida y yuda hobennan cu ta cay cera y yuda den duna les na esunnan cu lo desea esaki”, e la cuminsa na bisa. ““Sigur e ta un situacion duro pa mi y mi famia. Momentonan dificil cu nos ta pasando aden pero cu un confiansa y energia positivo nos ta sali for di esaki tambe. Mi lo sali hopi mas fuerte di henter e situacion aki. No ta e ultimo cu boso lo scucha di Paul Croes” e ex mandatario lo a declara, segun e portal 24ora.com. 

E CASO 

Corte di Casacion dia 7 di februari ultimo a rechasa e peticion di e ex minister pa destrui e sentencia den su caso di corupcion conoci como caso Ibis. Como tal, e ex mandatario mester a  cu sinta su castigo den prizon. Manera Noticiacla a raporta na december 2022, AG a mustra caba den su conseho cu e peticion di Croes mester keda rechasa. Ta conoci cu pa 99% Corte di Casacion ta tuma e conseho over, pues e sentencia di awe no a bin como sorpresa.E sentencia original mes tabata dia 22 di februari 2019 unda cu e la tende cu e mester a sinta 4 aña den prizon. Na october di 2021, den corte di apelacion, huesnan a reduci su castigo di prizon di 4 aña na 3 aña. Esey tabat kier men cu awor e ex mandatario mester a raporta na KIA y sinta castigo di 3 aña menos. tempo cu e la sinta den aresto preventivo.  Click AKI pa e sentencia..