Maduro: Ta mustra manera CAFt kier sinta riba stoel di gobierno

ORANJESTAD – E colegio di supervision pa Aruba, CAFt kier sinta riba stoel di gobierno. “Esey no ta e trabou pa cual CAFt a wordo institui”. Esaki tabata pensamento di minister di Finanza Xiomara Maduro durante su presentacion diahuebs riba e situacion entre gobierno cu CAFt. Manera cu noticiacla a raporta e siman aki caba, e reaccion di e colegio riba e presupuesto 2022 di gobierno no tabata nada positivo. De hecho, a haci indicacion cu si no haci e cambionan necesario, Aruba por haye cu un posibel instruccion (aanwijzing). E mandatario tabata kier sa ‘a base di kico, lo duna un aanwijzing, si gobierno ta cumpliendo manera mester’.

RESUMI Y PRETENDE

Segun Maduro, tur loke cu CAFt a y ta haci, ta resumi cosnan di pasado, sin bin cu nada nobo y sin bin cu un contra argumento y no ta bin cu nada nobo. Asina e ta referi na e 13 ‘recomedacionan’ cu e colegio a haci den su ultimo reaccion. CAFt enberdad ta confirma cu mayoria di e recomendacionan ta cosnan ‘bieu’, pero ta pasobra gobierno sea no ta haci caso di e recomendacionan of no ta implementa nan completo of manera mester ta. Loke mas a irita e mandatario diahuebs, ta cu CAFt ademas ta bin cu dos punto of remarke riba temanan cu no ta aparece mes riba e presupuesto. Tambe Maduro ta considera malo ta e echo cu CAFt ta blo critica, sin tene cuenta cu e loke cu gobierno contesta, y ta bira un situacion estilo di ‘e di cu e ta’. 

NORMA NOBO

Maduro a sigura cu gobierno ta cumpliendo cu tur norma manera stipula, pues no ta compronde e problema cu CAFt tin. Ademas, segun Maduro, CAFt ta bin cu norma nobo, of nan mesun norma cu nan mes a pone, sin cu e ta palabra. “CAFt ta bin cu nan eigen invulling’ y esey simplemente no por, segun e mandatario. “E cos no ta traha asina akinan” e mandatario a bisa mas specifico.