CAFt: Gobierno di Aruba mester ahusta presupuesto 2022 sino wanta consecuencia

ORANJESTAD – Gobierno di Aruba mester adapta presupuesto 2022 y (taba)tin te dia 24 di mei (ultimo) pa informa e colegio di supervision di Aruba (CAFt) con esaki lo sosode. Si e no haci esaki, e colegio por actua conforme e ley di LAFt cu por conduci na un instruccion (aanwijzing) conforme articulonan 11 y 12 di e LAFt. Asina CAFt a bisa den nan ultimo conseho riba e presupuesto cu a keda publica e siman aki. “CAFt ta di opinion cu tanto e presupuesto como e presupuesto pluriannual, no ta cumpli suficientemente cu e normanan di e protocol di LAFT y ta conseha Aruba pa ‘adapta e presupuesto’. Y e menciona no menos cu 13 ‘recomendacionan’ cu gobierno di Aruba mester cumpli cu ne. 

NO TA CUMPLI

Problema segun CAFt, ta cu un cantidad di e recomendacionan ta data caba desde 2019, y cu Aruba sea no a cumpli cu ne of no ta cumpli suficiente cu e recomendacionan aki. “Door di no sigui of a sigui e recomendacionan completo, e no ta permiti e pais pa exploita e oportunidadnan pa mehora e finanza publico” CAFt ta sigui bisa. Algun di e recomendacionan aki ta nobo y tambe basta fuerte. 

RECOMENDACIONAN

Entre e 13 recomendacionan haci, CAFt kier pa gobierno reduci e suma di ‘goederen en diensten’ cu 39 miyon pa e por ta riba e nivel prome cu e pandemia. Ademas, CAFt kier pa gobierno di Aruba obliga Serlimar pa resolve su problemanan interno di cobransa pa limpiesa, y pa gobierno saca e sosten financiero adicional di 3 miyon for di presupuesto. Ademas, ta pidi pa mantene e recorte salarial di 12.6% te ora cu bin claridad di RMR, y pa elimina e postnan provisional di 11 y 8 miyon respectivamente pa personal. Ademas ta pidi pa wanta e gastonan di personal te AWG 417 miyon pa asina cumpli cu e norma di personal segun e acuerdo di protocol. Un di e problemanan cu CAFt tin ta e hecho cu gobierno a reduci e entrada di Loonbelasting cu 15 miyon, y como tal kier pa e compensa esaki cu un aumento structural. Tambe CAFt kier pa gobierno mehora e cumplimento di pago di impuesto, pa asina por aumenta e entrada na impuesto y no mester reduci esaki cu 20 miyon. Tambe CAFt ta sigui insisti riba e cortamento di gasto den cuido medico (lesa:AZV), y kier sa ki tempo e medidanan den cuido ta wordo implementa, cuanto perdida AZV lo tin e aña aki y cua medida di compensacion lo wordo implementa den e presupuesto. Y tambe CAFt kier pa elimina e creacion di un fondo di prespuesto (begrotingsfonds). Esaki ta simplemente algun di e recomendacionan (total ta 13). Pa e lista completo, lesa e rapport AKI.