Biyonario Jeff Bezos a logra drenta espacio pa algun minuut cu su cohete

TEXAS – E homber mas rico na mundo, e biyonario Jeff Bezos a drenta espacio exitosamente diamars mainta y a keda algun minuut den espacio prome cu e la bolbe tera. Den 4 minuut e la yega 106 km di haltura y despues di 7 minuut e capsula New Shephard a aterisa bek den desierto di e estado di Texas. Hunto cu Bezos, a bay su ruman homber Mark, un ex instructor di buelo di NASA di 82 aña di edad y e hoben Hulandes di 18 aña Oliver Daemen. E buelo di e cohete Blue Origin, ta e prome cu hende a bordo. A test e cohete 15 biaha caba pero sin hende. E motibo cu e Hulandes a logra bula ta debi cu esun cu e gana e subasta (e la subasta 23 miyon dollar) no por a bay mas. No ta conoci cuanto e tata di Daemen a paga pa e buelo, pero ta den e centenares di miles di dollar. E intencion ta pa reusa e cohete y e capsula varios biaha den un tipo di biahe pa civil, promoviendo asina turismo espacial. 

BRANSON

E colega biyonario di Bezos, esta Richard Branson un siman prome a sa di yega espacio prome den su propio cohete Unity di e compania Virgin Atlantic. E biaha ey Branson a logra yega 80km den espacio, cu ta e frontera pa yega espacio. Segun e organisacion internacional di espacio FAI sinembargo, 100 km riba planeta tera ta e frontera cu espacio.