AZV: A haci intento pa baha cortamento di gasto, pero no a logra ainda

ORANJESTAD ‘AVZ ta hacienda intento pa riba tur tereno di cuido medico, corta e reduccion riba gasto den 2021. No ta sigur cu e intentonan aki lo logra’ ta loke e Seguro general medico su director interino Edwin Jacobs den un carta  ta manda contesta esnan den sector di cuido medico cu recientemente a manda un carta habri riba e tema. Nan a pidi pa para e.o. e reduccion di 5 miyon mensual y mas corte. Mes momento AZV a sigura cu por lo pronto e medidanan di cortamento lo continua ‘pasobra no tin un fecha di paro menciona den e instruccion’, e director ta sigui bisa. 

E INSTRUCCION

E carta ta inicia cu un mencion di AZV di e instruccion cu nan a ricibi di gobierno riba 19 di juni aña pasa pa implementa un reduccion di 5.5% den cuido medico y pa reduci e presupuesto. Y segun AZV den su carta, for di momento cu contenido di e landspakketen a keda anuncia, a cuminsa haci e intento pa reduci e cortamento den gasto. Ta haci mencion di un carta cu minister di salud Dangui Oduber a manda recientemente pa e colegio di supervision financiero CAFt cu e intento pa reduci e reduccion di gasto. Relaciona cu esey, AZV ta bisa cu no por a reacciona y contesta e grupo medico mas prome. A repasa e cortamento unda cu ta specifica cu esaki ta 5.5% riba presupuesto y tambe riba un plafond pa tratamento, y cu lo retene 5.5% riba declaracionan di e provedoornan di servicio medico. “Asina cu tin desaroyo nobo, unda cu por tin cambio posible, nos lo consulta y informa mesora, pa adapta e cambionan necesario’. Mes momento a bisa di ta compronde e situacion y sacrificio cu tur den cuido medico ta hacienda. Lesa e carta AKI.