Sector medico cu otro intento pa logra para cortamento di gasto medico

ORANJESTAD – Den un otro carta ‘habri’ dirigi pa conseho di minister y Parlamento, 13 asosacion y instancia medico di Aruba a haci un peticion pa considera 4 punto cardinal como solucion pa resolve e problema di cortamento di gasto den cuido medico. Manera relata caba, e no ta e prome intento di e gruponan aki, pero e biaha aki tin puntonan specifico y ta dirigi na e dos instancianan menciona. Entre e cartanan tabatin uno na juni di aña pasa cu a manda pa secretario di estado Hulandes Raymond Knops. 

MOTIBO

Un di e problemanan y preocupacionan principal cu e carta ta cuminsa cu ne, ta pa alerta esnan pa ken e carta ta dirigi, cu si sigui asina, aceso di aseguradonan na AZV dentro di poco lo no ta sigur mas. Ademas e calidad di servicio, a termino medio y largo, lo no ta garantisa mas, te na e nivel cu lo mester para esaki. Ta papia di cortamento di gasto den AZV cu ta pone cu e tin menos placa pa traha cune, pero cu gastonan medico si no a baha. Nan ta preocupa cu no conoce e presupuesto di AZV y e pensamento di kico y con a logra y kico a corta y kico no. Tambe e grupo ta mustra cu e crisis no necesariamente mester resulta den algo malo, pero ta netamente un oportunidad pa remedia hopi cos cu pa hopi tempo no tabata cana bon. 

SOLUCION

Diferente cu e otro cartanan, e biaha aki a presenta 4 punto concreto cu kier pa esnan cu mester ricibi e carta, por tene na cuenta pa por resolve e situacion actual di e cuido medico relaciona cu e crisis. Entre e puntonan, ta sugeri pa para e cortamento di 60 miyon den cuido medico manera cu e ta aworaki. Ademas haci cortamento of bin cu medida unda cu no tin consecuencia medico. Y ta sugeri pa hunto cu AZV di awor pa juli 2021 sinta negosha hunto con por yega na cortamento di gasto medico cu ta corecto, y finalmente introduci e medidanan na final di juli 2021 pa asina e tin efecto e aña aki ainda. Manera indica, e carta ta firma pa 13 gremio, asosacion medico di Aruba incluyendo hospital, HAVA, sindicato y mas. Ta practicamente tur instancia medico a pone nan firma bou di e carta habri aki. Pa e contenido di e carta, click AKI.