NV Elmar: Nombracion di director nobo tabata proceso hopi riguroso

ORANJESTAD – Nombracion di director nobo pa NV Elmar tabata un proceso hopi riguroso. Ademas fuera di confirma e noticia cu e portal aki a trece algun dia pasa di nombracion di e director nobo, NV Elmar a informa tambe diamars cu e director nobo Anthony Irausquin lo wordo paga conforme e Wever Croes norm nobo. Cu esaki e ta cumpli cu e rekisito recien anuncia. Ademas e compania a comparti basta den detaye como e proceso di nombramento a bay, evitando cualkier speculacion cu por tin rond di su nombramento. 

ADVERTENTIE

Ya pa basta tempo caba a saca un advertentie pa un open solicitatie den corant cu ta busca un director general pa N.V. Elmar. Nan a puntra pa un persona cu ta conoci? cu e cultura arubano y mester tin un educacion administrativo y conocemento di tecnica.

Na Elmar tin hopi ingeniero cu ta domina e parti di tecnica. Ultimamente nan a re-enforsa Elmar cu un financial controller pa asina tin e parti financiero mas fuerte. Tambe a nombra un Human Resource adviser pa handle e parti laboral na Elmar. Awor tabata falta ainda e director general cu por manage tur e tres departamentonan aki pa asina hasi Elmar un compania mas fuerte.

Despues di e fecha cu a clausura e entregamento di carta a cuminsa un proceso di evaluacion. A hasi un psychologische test pa e candidatonan mas mihor cualifica y a bin cu un advies di parti di e psicologo. A entrevista tres candidato door di miembronan di e Hunta di Supervision di Utilities Aruba y Elmar y tambe director di Utilities Aruba como shareholder di Elmar. Despues cu tabata tin un consensus kende pa nombra como e director nobo ainda mester a bay na e 10 lenders di Elmar pa busca nan ”written consent”.

Dia 27 di November 2019 Utilities Aruba hunto cu Elmar y WEB a sera? un “Loan Agreement” cu 10 banco na unda a fia 503 miyon florin den promer tanda. Den e Loan Agreement tin un articulo 13.12 cu e lenders mester aproba nombracion di un director di companianan y tambe miembronan di e Hunta di Supervision. Dia 2 November 2020 a ricibi nan “written consent”

Den e aplicacion cerca e lenders mester a manda standard un PQ, Personal Questionnaire, y un Comprobante di Buena Conducta di Ministerio Publico di Aruba. Na final den un reunion general di accionista di Elmar (AVA) a aproba e proposicion pa nombra sr. Anthony Irausquin como director general di N.V. Elmar. E ora ey, director di Utilities Aruba N.V., ta autoriza pa firma un acuerdo di trabou cu sr. Anthony Irausquin.

KI DIA LO CUMINSA

Sr. Irausquin lo cuminsa su trabao dia 1 di januari 2021. E acuerdo aki ta encera tambe cu e parti di salariering ta cumpli cu e normanan nobo di e Wever-Croes norm. Pabien na Elmar pa despues di un temporada largo haya un director nobo cu lo sa di hiba Elmar den un rumbo nobo. Den e proximo añanan Elmar lo ta sigui hasi un transicion pa mas digitalizacio?n. Akinan lo sigui cu introduccion di Smart Meters cual lo hasi posibel pa elmar por hasi su red di distribucion mas eficiente i duna mihor servicio. E introduccion di Autonan Electrico lo exigi un ampliacion di nos Red y instalacion di EV Chargers Muy probablemente haya un tarief di anochi mas abou pa por carga bateria di auto. Mester bay duna mas atencion na e estado di e instalacionnan manera kabel y transformers pa hasi e distribucion di coriente mas “reliable”. Recientemente a cuminsa monitor algun Key Performance Indexes manera SAIDI, SAIFI, CAIDI y ASAI. Esakinan mester duna un overview di e reliability di e distribucion di coriente. Tambe a gradici ing. Albertico Kooman pa funciona como director interino pa un periodo di casi dos aña.