Otro siman Hulanda por cambia Aruba bek pa codigo geel

ORANJESTAD – Si tur cos ta bon, otro siman Hulanda lo cambia e status di Aruba su codigo di biahe di oraño pa geel atrobe. Asina minister di turismo Dangui Oduber a bisa e portal aki awe mainta. Segun e mandatario, diabierna el a papia cu secretario di estado Hulandes Paul Blokhuis responsabel pa Salud y deporte. Y basa riba e combersacion aki, Hulanda lo ta evaluando pa cambia e conseho di RIVM. E consecuencia ta cu e ta habri posibilidad pa mas hende biaha di Hulanda pa Aruba. Cu e codigo oraño, solamente biahenan esencial ta permiti. 

NO TA HUSTO

Siman pasa ainda den un combersacion cu e mandatario, el a confirma na e portal aki cu e hecho cu e status di Aruba pa biahamento ta riba ‘oraño’ ainda, mientras cu e cifranan di COVID19 ta mucho mas abou cu esun di p.e. Corsou actualmente pero unda cu nan si ta riba status ‘geel’, no ta logico. Asina hopi hende ta opinando localmente. E portal aki a compronde cu gobierno tambe ta di mesun pensamento y cu nan tampoco no ta haye logico. “E no ta logico cu Corsou cu tin mas caso activo cu nos, ta riba geel y nos ta riba oranje cu menos caso activo” minister di salud y di turismo Dangui Oduber a admiti siman pasa diahuebs ainda.

E SITUACION

Manera ta conoci, e islanan ABC ta marca pa un status di biahe di color, cu ta varia entre geel y oraño segun gobierno di Hulanda. Si un isla/pais ta oraño, e tin un conseho negativo y ta pone cu ta pa biahenan esencial so y ta desaconseha vacacion. Esey ta ora cu e situacion di COVID19 ta di tal indole cu ta hacie pa proteccion di e biaheronan Hulandes. Ora cu un pais ta mas ‘controla’, ta suaviza e status pa uno ‘geel’ cu ta pone cu no tin problema pa biaha. Recientemente e situacion di Bonaire tambe a mehora y a cambia di status oraño pa geel. Sinembargo, Aruba ketobay ta oraño, siendo cu pa varios siman e cifranan ta den caida, y ironicamente esun di Corsou a subi alarmantemente, te cu diaranzon siman pasa el a yega un total record di 51 caso positivo pa un solo dia, mientras Aruba tabatin apenas 8. Y riba e punto aki, hopi hende no ta compronde e situacion aki. Den e parti di casonan activo, tambe Corsou a yega 315 mientras Aruba tabatin 169. E cantidad mientrastanto pa Corsou a aumenta y pasa 400 mientras cu Aruba a baha bou di 100.