Oduber: No ta logico cu Aruba cu menos caso di COVID19 ta oraño siendo Corsou ta geel cu mas caso

ORANJESTAD – E hecho cu e status di Aruba pa biahamento ta riba ‘oraño’ ainda, mientras cu e cifranan di COVID19 ta mucho mas abou cu esun di p.e. Corsou actualmente pero unda cu nan si ta riba status ‘geel’, no ta logico. Asina hopi hende ta opinando localmente. E portal aki a compronde cu gobierno tambe ta di mesun pensamento y cu nan tampoco no ta haye logico. “E no ta logico cu Corsow cu tin mas caso activo cu nos, ta riba geel y nos ta riba oranje cu menos caso activo” minister di salud y di turismo Dangui Oduber a admiti diahuebs mainta. 

E SITUACION

Manera ta conoci, e islanan ABC ta marca pa un status di biahe di color, cu ta varia entre geel y oraño segun gobierno di Hulanda. Si un isla/pais ta oraño, e tin un conseho negativo y ta pone cu ta pa biahenan esencial so y ta desaconseha vacacion. Esey ta ora cu e situacion di COVID19 ta di tal indole cu ta hacie pa proteccion di e biaheronan Hulandes. Ora cu un pais ta mas ‘controla’, ta suaviza e status pa uno ‘geel’ cu ta pone cu no tin problema pa biaha. Recientemente e situacion di Bonaire tambe a mehora y a cambia di status oraño pa geel. Sinembargo, Aruba ketobay ta oraño, siendo cu pa varios siman e cifranan ta den caida, y ironicamente esun di Corsou a subi alarmantemente, te cu diaranzon el a yega un total record di 51 caso positivo pa un solo dia, mientras Aruba tabatin apenas 8. Y riba e punto aki, hopi hende no ta compronde e situacion aki. Den e parti di casonan activo, tambe Corsou a yega 315 mientras Aruba tin 169. 

GOBIERNO

Ora cu e portal aki a acerca e mandatario, el a admiti cu enberdad e cos no ta logico. “Correcto, nos ta den combersacion diariamente cu Hulanda riba e tema aki. As a matter of fact den weekend mi a tuma contacto cu secretario di estado di VWS sr Blokhuis pa pidi claridad riba esaki” e mandatario a bisa, indicando cu e no ta di acuerdo cu e situacion. Segun e mandatario, el a wordo informa cu esaki lo wordo atendi e siman aki.” Hulanda ta trahando riba un “afwegingskader” nobo pa Caribisch Nederland” Oduber a bisa e portal aki. Mester compronde bou di esaki cu lo ‘evalua’ e situacion diferente pa e islanan aki, compara cu e forma con esaki ta sosodiendo aworaki.