Opinion: Movimiento Futuro pa un Aruba nobo ta di fiesta y ta celebrando

Opinion: Movimiento Futuro pa un Aruba nobo ta di fiesta y ta celebrando

Posted on 11/16/2020 9:37 am AST | Updated on 11/16/2020 9:39 am AST

Skirbi pa Atan Lee

Tabata un emocion hopi grandi na momento cu nos a mira con Prome Minister di Aruba a pone su firma pa asina pone e prome piedra pa Aruba bira un “bijzondere gemeente”.

Un grupo chikito di persona, pero cu un sosten masal di e pueblo di Aruba na unda miles y miles di ciudadano a firma pa un gemeente. Diferente encuestanan a demostra cu pueblo di Aruba ta desea un gemeente, mescos cu ta e caso cu mas di 70 % di e pueblo di Aruba a pidi pa Gobierno firma cu Hulanda.

Desde siglo 17 Aruba ta pertenece na Hulanda y nos tin un pasaporte Hulandes. Betico d.f.m. su lucha ta pa Aruba sali for di Antiyanan Hulandes, NUNCA FOR DI HULANDA. Nos mester gradici Dios cu nos tin un pasaporte garantisa y ta pertenece na un di e paisnan mas rico di mundo, esta Hulanda.

Tur politiconan a grita pa no firma, hasta partidonan cu no tin representacion den Parlamento, pa Aruba no perde su autonomia. Un autonomia bashi y pober. Den apenas 34 aña di Status Aparte, politiconan elite miyonario cu placa di pueblo a laga nos bashi den un situacion di un pobreza total.

Mientras cu politiconan elite, por goza di pensionnan di 30 te cu 70 mil florin pa luna na un edad di apenas 45 aña y 50, mas miyones cu nan a cobra di placa di pueblo na “overbruggingstoelage”, ariba dje yuda famia y amigo bira miyonario, nos pais, dushi patria Aruba su hendenan ta sufri den un pobreza total. Pober y rico mester paga un bbo acumulativo cu ta yega na 36 % ariba un producto. ARUBA TIN E SISTEMA DI BELASTING Y BBO MAS HALTO DEN MUNDO.

Manera secretario Knops a bisa cu Aruba tabata na rand di ta falliet, un berguensa pa Aruba un di e paisnan mas rico den nos region, pero politiconan elite a caba cune, a mate!!!!

A dura Gobierno 6 luna despues di a consulta hasta cu e kleuternan pa tuma un decision pa firma cu Hulanda, mientras cu nos pueblo ta sigui bira mas pober. DANKI NA CORSOW CU A YEGA NA UN AREGLO CU HULANDA Y CU ARUBA POR A COPY PASTE E AREGLO, CAMBIANDO E NOMBER, PERO E CONTENIDO TA KEDA MESCOS.

Pa 7 aña largo Aruba ta un “bijzondere gemeente” den Reino y sigur ora cu pueblo mira cu ordo, disciplina, respet, balor y norma a bolbe bek den nos isla, ya e no ta un pais mas, pero un isla, nan mes ta desea pa nos bira pa semper un gemeente, manteniendo Betico como nos libertador, nos himno, bandera, cultura, nos fiestanan Nacional y cultural, pero un isla cu nos por bati ariba nos pecho y bisa Aruba dushi tera.

UN COS SI, PAIS ARUBA A LAGA ATRAS UN DEBE DI ARIBA 10 BIYON FLORIN. CON LO PAGA ESAKI?

Adios corupcion, adios fraude, adios abuso di poder, adios fabor y enriquisimento di famia y amigo.

PABIEN NA E MILES Y MILES CU A SOSTENE NOS, DIOS BENDICIONA BOSO Y TAMBE PA E AMOR CU BOSO A MUSTRA PA BOSO PAIS, AWOR ISLA STIMA, ARUBA DUSHI TERA.

DANKI PUEBLO.

MOVIMIENTO FUTURO PA UN ARUBA NOBO

  • Powered by SETAR