Wever: Richard Eman a cumpli cu su meta pa cu RdA

ORANJESTAD – E awor ex presidente di comisario di Refineria di Aruba (RdA) Richard Eman a retira di su funcion riba bon pia. Esey e portal aki a compronde di minister di energia Evelyn Wever Croes dialuna mainta. Noticiacla a raporta anteriormente riba e retiro 'sorpresivo' aki. Sorpresivo pa publico, pero awor ta mustra cu esaki no tabata asina sorpresivo. E retiro sigur no tabata relaciona cu e negociacionnan pa haya un operador nobo pa e refineria segun Wever, ya cu e hunta di RdA no ta envolvi den e fase aki di public tendering. Ta mas bien cu Eman a cumpli cu e metanan pa cual e tabata den e funcion aki segun Wever.  “Mi ta gradici sr. Eman pa tur su esfuerzo y trabou nan. E ta laga un legacy importante den corto tempo” Wever a cuminsa na bisa. 

PROCESO INDEPENDIENTE

Segun Wever, Eman no tabata envolvi den e proceso pues e ora mester saca afor cu no ta pa esey Eman a retira. “Nos a apunta un comision independiente pa esey pa evita cualquier percepcion cu Gobierno directamente of indirectamente via su hunta di comisario, ta envolvi cu e escogencia di e interesadonan” Wever a clarifica pa e portal aki tambe.

TRABOU DI EMAN

Pa loke ta e retiro di Eman, Wever ta sigura cu Eman a hasi trabou nan grandi, entre otro investiga e ex director te na su retiro y trece na luz di dia e practicanan dudoso di influencia di gobierno anterior den e compania.” Wever a cuminsa na bisa. “Tambe a trece na luz di dia e contract di Richard Arends, cu a keda secreto hopi tempo. Y a traha riba e atraso cu tabata tin riba e cuentanan anual di e compania. Tambe (e la) logra finaliza e contract cu Citgo. Esakinan ta logronan hopi importante den corto tempo, cu ta crea mas integridad y good  corporate governance practices.” Wever a bisa. Esey tabata e palabracion cu el a haci cu Eman ora cu Eman a tuma e encargo na 2018.  Y awor e ta bay enfoca riba un solo meta. “

Manera bo sa Sr. Eman a asumi dos cargo importante pareu: RdA y Utilities. Awor e ta bay sigui concentra riba Utilities. Mi ta gradici Richard Eman pa su añanan di servicio den hunta di comisario” Wever a finaliza bisando.