Opinion: Maneho y leynan “straño” di inmigracion

Opinion: Maneho y leynan “straño” di inmigracion

Posted on 10/29/2020 2:46 pm AST | Updated on 10/29/2020 2:47 pm AST

 Skirbi pa Clyde Harms

Diescinco aña pasa cu mi a pidi permiso pa mi señora (di nacionalidad venezolano) bin biba na Aruba, DIMAS a constata cu mi mes mester di permiso, pasobra mi ta “stranhero”, naci na Corsow. Berdad, mi a nace na Corsow, pero nunca ami a biba aya y semper mi a considera mi mes un Arubiano “de pura sepa”. Mi mayornan nunca a biba na Corsow. Mi mama a bay Cosow pa pari mi aya pasobra e tempo ey e servicio medico na Aruba tabatin hopi problema. Despues di 10 dia el a bolbe Aruba cu mi.

Señor “Booshi” Wever, e tempo ey Minister encarga cu DIMAS, a bisa cu e hendenan di DIMAS no tabata sa loke nan ta haci. Desafortunadamente, señor Wever tabata ekiboca. DIMAS tabata ehecuta e ley corectamente. E ley tabata, y ainda ta, “straño”. Betico Croes a bisa cu “Arubiano” ta tur cu ta biba aki y lucha pa Aruba. Apesar di a biba aki mas di setenta aña y haya tur clase di reconocemento, di gobieno mes y di otro instancianan, pa loke mi a haci pa nos isla, ley tabata considera mi stranhero y tabata exigi pa mi aplica pa un permiso di estadia. Despues di hopi bululu mi a logra haya mi permiso y mi por a saca e permiso pa mi señora. 

Aña pasa, mi a inscribi un eenmanszaak na Camara di Comercio pa mi opera un Airbnb. Despues di un siman, un dama di CdC a yama mi pa bisa mi cu nan a constata cu ta na Corsow mi a nace, y pesey, como “stranhero” ami mester pidi permiso di Departamento di Asuntonan Economico, Comercio y Industria (DEZHI). Mi a haya e maneho aki “straño”, pero mi a haci loke nan a bisa mi. 

Despues cu mi a paga e suma di 400 Florin, DEZHI a cuminsa procesa e peticion. Algun dia despues, nan a yama mi pa puntra si mi ta bay ricibi turista di exterior. Mi a haya e pregunta ridiculo. Ken ta bay cuminsa un Airbnb na Playa pa ricibi solamente turista di Savaneta, Noord, y otro distritonan di nos isla. Tambe DEZHI a hala mi atencion cu mi lo tin di cobra cierto “toeristenheffing” di e visitantenan y pesey mi mester registra na Departamento di Impuesto (DIMP). Atrobe e maneho a cay mi straño. CdC no a bisa mi nada di “toeristenheffing” y si mi tabata “Arubiano” mi lo no a bay DEZHI pa haya sa. Lo ta posibel cu e maneho di cobramento di “toeristenheffing” no ta aplica pa Arubianonan cu ta opera Airbnb? Esaki ta duna nan un bentaha grandi den nan competencia cu stranheronan manera ami y ta perhudica pueblo di Aruba cu ta laga di ricibi e miyones di “toeristenheffing” cu no ta wordo cobra.

E aña aki mi señora a aplica pa haya nacionalidad hulandes. Pa mi sorpresa enorme, mi a descubri cu na e momento cu e haci su huramento pa haya su ciudadanio Hulandes, e lo haya tambe derechonan Arubiano como si fuera el a nace na Aruba. Es decir, pa ley e ta bira Arubiano, mientras cu ami ta keda “stranhero”, naci na Corsow.

Esaki no ta un ley of maneho cu ta bruha hende?   

[email protected]  

  • Powered by SETAR