POR a cambia di pensamento y ta evalua pa bay na 7 minister

ORANJESTAD – Apenas un dia despues cu e lider di partido POR a bisa e portal aki cu e hecho cu MEP ta haya e cartera liber di ex minister Marisol Lopez Tromp ‘temporalmente’, e partido a informa cu nan ta ‘evaluando’ pa bay na 7 minister y pa ‘reparti e tareanan ministerial’. Tur esaki ‘debi na e situacion financiero critico di pais Aruba debi na e impacto di COVID19’. No ta conoci si ta presion di e partido MEP a pone e lider di partido POR cambia di pensamento, ya cu manera indica, apenas un dia prome, el a bisa e portal aki otro cos. Pero, manera ta bida, den tur cos, un persona tin e oportunidad pa cambia su pensamento. 

CAMBIO DI PENSAMENTO

Segun e comunicado, saca 24ora despues cu e minister di e partido a bisa otro cos, e partido ta bisa cu ‘mirando e impacto financiero sin precedente riba e finanzas publico di pais Aruba door di e pandemia COVID-19, Minister pa partido POR, mr. Andin Bikker, y fraccion di Partido POR den Parlamento, parlamentarionan Sr. Alan Howell y Srta. Dellanire Maduro, ta di pensamento cu lo ta bon pa den interes general di Aruba, pa bay bek na 7 minister’. E comunicado ta sigui bisa cu alaves nan ta di pensamento cu lo ta bon pa reparti e peso di e cartera di e Ministerio di Desaroyo Teritorial, Infrastructura y Medio Ambiente riba diferente Ministerio den e Gabinete existente. “ Cu esaki Partido POR lo adresa e deseo di nos comunidad, partidonan di coalicion y plan di gobernacion di partido POR pa un gobierno di 7 minister. Den e dianan nos dilanti POR lo bay delibera riba e pensamento aki y cu miembronan di Coalicion” e comunicado ta finalisa bisando.