Bikker: Cartera di minister di POR cu a MEP haya, ta temporal

ORANJESTAD – E hecho cu un di e carteranan di minister di partido politico POR ta bay pa partido MEP, ta algo temporal. Asina lider di e partido Andin Bikker a clarifica pa noticiacla.com dialuna atardi. Esaki ta basa riba e situacion cu a surgi recientemente cu retiro di ex miembro Marisol Lopez Tromp, unda cu e mes( Lopez Tromp:red) a cuestiona esaki diasabra den su conferencia. Prome minister Evelyn Wever Croes mientrastanto a tuma e carteranan di Lopez Tromp aworaki. 

PERMANENTE OF NO

Tabatin e pensamento cu esaki lo ta ‘permanente’, esta te cu fin di e gobernacion aki, pero awor ta resulta cu esaki no ta e caso. “Minister president lo atende e Ministerio temporalmente, mescos cu biaha pasa ora cu sr. Oduber a retira dia 12 di december. Dus no a tuma nada over” tabata reaccion di sr Bikker.

REDUCI MINISTER PA 7

Manera ta conoci, partido MEP a bay campaña na 2017, bisando cu lo tin menos minister y a papia di 7. Pero na final a bin mas minister toch. Y ora cu a bin e situacion di retiro di awor ex minister Marisol Lopez Tromp, mesora e prome minister Wever a bisa cu MEP ta bay haya e cartera, pa asina reduci gastonan di minister. 

OVERBRUGGINGS TOELAGE

Esaki saliendo di punto di bista, cu ya caba ta pagando overbruggings toelage pa un persona como minister (Ex minister Otmar Oduber), y awor tin cu bay paga uno mas (pa awor ex minister Marisol Lopez Tromp). Pues tin cu bay paga 3 minister (2 retira y uno den funcion). Tabata bou di impresion cu esaki lo mester a bira algo permanente, pero despues a compronde cu esaki ta temporal. Y awor sr Bikker tambe di parti di POR, ta clarifica cu enberdad e ta algo temporal.