Cantante y DJ a desmenti cerca DVG cu nan lo ta tocando e weekend aki!

ORANJESTAD – E conocido cantante Cesar Olarte y tambe e disc jockey miho conoci como DJ 101, a desmenti diabierna na departamento di salud (DVG) cu nan lo ta participando den eventonan musical e weekend aki, violando asina e reglanan impone pa Crisis Team relaciona cu COVID19. Asina Crisis team a informa diabierna atardi. Nan a sigura cu nan ta na altura di e situacion y cu nan nomber por ta poni pero nan no ta participando. E clarificacion ta bin despues cu DVG mas prome a publica e situacion cu ta planea pa sosode, y unda a haci mencion specifico di e dos nombernan menciona. 

NAN REACCION

Segun Olarte, mas specifico, el a indica cu nan ta conciente cu no por tin musica anima ainda y cu nan ta cumpliendo cu tur medida y cu nan no ta participando na e eventonan aki. E reaccion di Crisis team tabata cu cerca nan e informacionan di evento ta yega di mes manera cu e ta yega na comunidad; como un invitacion. Mirando e riesgo cu e eventonan aki ta trece cu ne, tabata nan deber di trece informacion riba esaki. Segun e comunicado ultimo, nan ta informa cu tin di e evenementonan aki cu ta publica riba facebook y tin cu ta pasa como invitacion riba whattsap. 

MAL SPOT

Segun Crisis team , nan ta sigura cu “no ta e intencion di Crisis Team pa pone ningun musico su nomber den luz negativo, simplemente ta trata aki di proteccion di nos comunidad”. Asina mes, lo controla fuertemente e weekend aki pa wak si enberdad tur hende ta cumpliendo cu regla.