Encuesta: Gabinete Wever fuerte den Sta Cruz pero malo den Noord

ORANJESTAD – Segun e ultimo encuesta cu noticiacla a presenta recientemente, no solamente cu esnan cu a participa no tabata mucho positivo cu Gabinete Wever Croes su trabou, sino segun e datonan extra (cu e portal aki ta presenta awe), e districto cu nan ta mas mal para ta Noord, y esun mas fuerte ta Sta Cruz. Esaki ta conta tambe pa esnan cu a duna puntuahe pa trabou di Parlamento. Den e raportahe aki, nos ta cubri e datonan manera e forza pa districto y tambe edad, segun e preguntanan ta wordo haci. 

MINISTERNAN PA DISTRICTO

Di e 9 minister cu tabata den e encuesta (incluyendo ex minister Otmar Oduber), 8 a score mas popular den Sta Cruz. Otmar Oduber ta e unico minister cu a score como districto mas popular pa minister, Paradera pues aki e tabata mas fuerte. Tene na cuenta cu Otmar Oduber tabata parti di e gabinete pa 2 aña (so).Pa loke ta e districto menos popular, 7 di e 9 ministernan (Wever Croes, Maduro, Romero, (Glenbert) Croes, Besaril, Otmar Oduber)a score mas malo den Noord y 3 (Andin Bikker, Rudy Lampe, Dangui Oduber) a score mas malo na San Nicolas tambe. Pues tin a tabla entre Noord y San Nicolas pa esun mas malo. Pues e gabinete aki, segun resultado di e encuesta, mester bay traha duro den Noord y San Nicolas den e proximo eleccion si nan ta bay sigui cu e grupo di persona aki.

MINISTERNAN PA EDAD

Pa loke ta e reparticion den edad, di e 9 ministernan cu a participa (incluyendo ex minister Otmar Oduber), 6 a score mas halto den categoria di edad 18-24, y 3 a score mas halto den e edad 65 y mas halto. Pues e gabinete aki ta solido den e grupo di hoben, y algun den e grupo di edad di 65 y mas halto. 

KI TIPO DI GOBIERNO

Pa loke ta e pregunta, ki tipo di gobierno Aruba mester, esun di un solo partido a vence tur otro opcion, cu esun pa un zaken/taken cabinet na un di dos lugar hopi cerca. E datonan adicional awe ta mustra cu e den districto di Savaneta e deseo ta mas grandi (33%), y ta den e grupo di edad di 65 y mas halto (33%), pues esnan di mas edad y residencia na Savaneta cu a participa den e encuesta, a pidi pa esaki. E di dos opcion cu a resalta, tabata un zaken/taken kabinet. Aki 31% di esnan cu a participa, tabata ubica na Oranjestad, y e grupo menos pro tabata Savaneta (23%). E grupo cu mas a desea e opcion aki ta entre 45 pa 54 aña (30%), mientras cu e grupo cu menos a pidi e opcion aki, tabata di edad 18-24 aña (16%).