Encuesta: Trabou di Gabinete Wever Croes te awo no ta di gaba

ORANJESTAD – Segun e resultado preliminar di e ultimo encuesta di noticiacla.com, e trabou cu Gabinete Wever Croes a desplega durante e ultimo tres añanan di su gobernacion, no ta di gaba. Banda di esey e unico minister cu a score halto ta Prome Minister Wever Croes, y tambe e encuesta ta mustra cu Parlamento a faya cu su trabou di controla gobierno bon. Y finalmente e encuesta ta indica cu Aruba ta prefera di tin un gobierno di un solo partido. E grafico adhunto ta duna un bista cla di e resultado segun average total pa cada minister. Den e di dos parti di e grafico, ta ilustra e ministernan cu no a cumpli e tres añanan completo di e  gobernacion; unda cu por mira cu minister Marisol Lopez Tromp ta score como esun miho den e periodo cortico sinta y minister Otmar Oduber como esun mas malo den su periodo sinta.

BISTA COMPLETO

For di e grafico, por nota pues cu un minister so a haya confiansa total di esnan encuesta, mientras 4 minister nan trabou no tabata impresionante y 3 minister nan trabou a keda rechasa completamente. Pa loke ta funcionamento di Parlamento pa e tarea di control, esaki tambe esnan encuesta no tabata impresiona y ta duna un 3 (mas of menos) y mescos pa e cumplimento di programa di gobernacion. 

TIPO DI GOBIERNO 

Y finalmente e opcion pa e tipo di gobernacion, esnan encuesta a prefera (atrobe) un gobierno di un solo partido (28.46%), mientras cu e opcion pa un ‘zaken/taken’ kabinet tabata un escogencia hopi cerca (27.58%). E di tres opcion segun esnan encuesta, tabata pa un tipo di gobernacion bou di Hulanda, manera un provincial (22.16%) y finalmente un gobierno di coalicion manera tin aworaki. Esey tabata esun menos popular cu 422 voto (21.80%) 

DATA

E encuesta aki a core for di dialuna merdia te cu diahuebs mainta, (3 dia) y tabata haci di forma digital, unda cu un total di casi 2000 persona (1943) a participa, di cual 57% tabata homber y 42% tabata hende muher. E mayoria di participantenan tabata di Oranjestad, (25%), y esun menos tabata di San Nicolas (7.89%). E forma di vota aki tabata a basa di un sistema di ‘schalering’ (‘Hopi bon’ te na ‘hopi malo’ cu ta igual na 5 te na 1 den punto). Pa haya e representacion corecto, a coy e average pa cada minister entre e opcionan y a pone e resultado den forma di puntuahe (5 mas halto y 1 mas abou). Manera semper, e portal aki no ta pretende cu e ta representa Aruba completo, pero ta duna un bista interesante entre esnan cu a participa. E detaye di e resultado pa districto y edad etc. ta keda publica proximamente pa e portal aki.