• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Aruba y Hulanda ta sigui diferencia cu otro riba fiansa nobo

DEN HAAG/ORANJESTAD – Hulanda y Aruba publicamente diabierna a sigui cu e tema di e fianza cu Aruba a dicidi di haci pa ‘tapa buraco’ cu manera cu Aruba ta bisa, a surgi y cu Hulanda inicialmente a nenga Aruba pa cubri segun Wever Croes, mientras cu Hulanda ta diferencia di opinion. Tabata secretario di estado Hulandes Knops diabierna cu a dicidi pa  sigui splica su ‘preocupacion’ riba e ‘deal di Aruba’, cu e no ta considera manera e mes ta bisa “no ta e manera corecto pa sali mas fuerte for di e crisis aki”. Premier Wever Croes riba un peticion di noticiacla.com pa reaccion  mesora a contra aresta e secretario di estado: ”E suma aki no ta aumenta e debe mas, manera ta wordo insinua den e articulo” Wever Croes ta bisa e.o. den su reaccion breve . (Nota: declaracion completo di minister presidente Wever Croes ta mas abou). 

E DECLARACION DI KNOPS

Mientras cu e portal aki a raporta riba e punto aki caba (diferencia di opinion riba e fiansa) den su edicion di diahuebs, diabierna (awe) e secretario Hulandes a sigui elabora, pero manera indica, mas detaya. E biaha aki usando cifras, ya cu “despues di mi conferencia di prensa digital di ayera merdia” Knops ta cuminsa bisa, “a sali den medionan cu Aruba ta bay fia pisa riba mercado di capital local, esta maximo 400 miyon florin” e secretario ta sigui bisa. Segun Knops, e ta haña esey “hopi remarcabel”, citando Aruba ‘ pasobra nos prestamo – cu duracion di 7 aña – ta bay acompaña cu un porcentahe di interes fiho di 5,3%, mientras cu tanten no ta paga nada bek’.    “ Esaki ta nifica cu Aruba ta pone un carga di 21 miyon florin na interes anual riba lomba di su poblacion, algo cu absolutamente mi no ta compronde. Pasobra con bo ta splica ciudadanonan di Aruba cu den e tempo di coronacrisis aki cada ciudadano, e proximo 7 añanan, ta perde casi 1400 florin” Knops ta sigui bisa.

AUMENTA DEBE

“ Banda di esey”, Knops ta continua bisando, “e debe di estado ta aumenta te na mas cu AWG 5 biyon of un quota di debe di BBP di 127% . Ademas mi ta puntra mi mes e ora ey: como pais bo kier ta entre e top dies paisnan cu debe estatal mas halto? Bo kier compromete e futuro generashon di e forma aki cu e problema?” Knops ta sigui puntra. E ta sigui bisa cu  anteriormente el a lesa cu Prome Minister Wever-Croes a indica cu, no obstante tur dificultad na Aruba y den mundo, ‘mester keda mantene confiansa cu Aruba lo sali mas fuerte for di e crisis aki’. “ Mi ta di opinion cu esaki no ta e manera corecto pa sali mas fuerte for di e crisis aki. Aruba lo a haci mihor si nan lo a papia cu  nos enbes di papia tocante di nos den publico.” Knops ta finalisa bisando den su declaracion diabierna. 

REACCION PROME MINISTER WEVER

Den un reaccion pa e portal aki diabierna merdia, Wever ta mustra cu cos no ta manera Knops ta pretende. “Manera splica caba, Aruba ta negociando cu Hulanda pa prestamo, plan A, pero momento cu Hulanda a nenga Aruba prestamo riba juli cu augustus, Aruba a bai busca plan B. Nos ta trahando riba ambos pasobra un gobierno responsabel ta hasi esey” Wever a cuminsa na bisa. “Y nos a haya nos forsa pa busca un plan B, pasobra Hulanda a nenga nos prestamo di juli y augustus. Nan a realisa nan eror y ayera a indica cu nan lo ta dispuesto pa presta nos e placa toch y nos ta wardando riba nan contesta” e mandatario a continua bisando. Y segun e mandatario, e ta sigura cu “Gabinete Wever-Croes lo no endeuda nos pais mas cu mester”. “Awor nos mester di Afl 170 miyon urgentemente y e anuncio di e suma ey a wordo publica” Wever ta continua bisando. E mandatario ta hasta recorda cu e forma aki di actua pa haya fondo, no ta nada nobo. “Semper nos ta pidi autorisacion pa mas, segun e espacio den presupuesto, pa por ta exitoso. Esaki a pasa 172 biaha caba den 34 aña” e premier ta continua bisando. Ademas, contradiciendo e declaracion di Knops, Wever ta sigura cu ‘“ e suma aki no ta aumenta e debe mas, manera ta wordo insinua den e articulo”. Y e mandatario ta hustifica su  mes asinaki :” Pasobra nos necesidad di liquides cu a wordo entrega na Hulanda ta Afl 400 miyon pa e resto di aña. Presta e placa via Hulanda of otro caminda, e debe ta aumenta mes hopi”. Y na final, e mandatario ta haya e reaccion no tin mucho logica: “Por lo demas, e ta un reaccion emocional cu no tin hopi logica, mi no ta haya necesario pa reacciona riba comentarionan emocional”.