Knops: E fiansa local haci no ta den interes di e ciudadano di Aruba

ORANJESTAD – Secretario di estado Hulandes Raymond Knops ta haya cu e hecho cu Aruba a dicidi di subi mercado local pa fia placa, lo por ta mas un problema pa Aruba mes, pasobra segun Knops, si bo fia contra 5.5% di interes envez di 0% (di Hulanda), e ora e ta limita e espacio riba presupuesto di Aruba mes. “No ta den interes di e ciudadanonan di Aruba pa fia placa riba mercado local, si tin un oferta di Hulanda pa hacie contra 0% di interes”. Knops a bisa durante su conferencia di prensa pa periodistanan di Aruba diahuebs mainta. 

AFECTA NEGOSACION

E pregunta tabata di noticiacla na e mandatario, si e hecho cu Aruba a fia placa awor cu no ta via Hulanda, si e por tin un efecto riba e negosacionan cu tin. Si e ta afecta e confiansa, e tono di negosacion, pasobra Aruba a opta pa fia sin ayudo di Hulanda, mientras cu e ta na mesa ainda cu Hulanda. Pero Knops a bisa cu debi cu e no tabatin detayes (“Prome minister di Aruba no tabata por y no kier a bisami mas detayes di e fiansa local”: Knops), ta dificil pa e bisa ki consecuencia e por tin riba e negosacion. Pero e ora a bay riba e consecuencia cu e fiansa tin pa Aruba mes. Aki mester pensa e.o. riba e hecho cu awor cu Aruba a opta pa fia local, cu e p.e. 7.6 miyon florin di interes (5.5% interes di 138 miyon florin) ta pueblo tin cu paga tanten cu e por tbt Afl. 0

EFECTO

For di fuentenan fidedigno, e portal aki a compronde cu e fiansa local lo tin efecto, den entre otro e tono, y tambe debi cu awor Aruba ta hinca su curpa den mas debe, por spera cu Hulanda lo aumenta su condicionan pa sigura cu Aruba por cumpli cu e situacion cu e la crea door di tin mas debe di bay paga awor, for di p.e. solamente e interes cu e tin cu bay paga pa e periodo di por lo menos 7 pa 8 aña.