Wever: Hulanda a pidi Aruba mas tempo pa manda documento riba entidad nobo

ORANJESTAD  – “ Hulanda a pidi mas tempo pa manda nos e informacion por escrito tocante e entidad nobo cu nan kier pone como condicion”. Asina prome minister Evelyn Wever a reacciona riba e hecho cu ainda Hulanda no ta kedando cla pa duna Aruba documento riba e tema, manera cu lo a priminti anteriormente. E ta referi na e tema di reunion di Conseho di Minister di Reino (RMR) cu mester a tuma lugar diabierna awor. “ E tema di fiansa na Aruba lo bai pa e reunion di RMR di 10 juli 2020” Wever a confirma. E problema ta cu e posponemento ta pone mas presion riba gobierno. 

PRESION

E presion cu Wever ta referi na dje ta cu mas e asunto aki tarda, mas problema financiero Aruba ta haya su mes den dje. A compronde cu e placa lo mester tabata cla pa di otro siman caba pa por a paga trahadonan. Pero posponemento di e decision, awor ta trece tardansa den esey tambe, cu tur su consecuencia. E decision awor lo tin cu cay un siman mas laat, esta dia 10 di juli 2020. 

CONSULTANAN

Cu e cambio aki, e reunionan di consulta cu gremionan y Parlamento programa pa diaranson (mayan) lo keda posponi tambe cu un siman. Asina prome minister a confirma tambe pa e portal aki. “Asina cu tin mas informacion, nos lo informa” Wever a sigura e portal aki. 

BESARIL

Algun rato prome, minister plenipotenciaro pa Aruba na Hulanda Guilfred Besaril a informa e portal aki caba cu tin tardansa den kedamento cla cu documentonan pa e reunion di diabierna awor 3 di juli, y cu tin chens cu por pospone esaki.