Reunion di RMR pa aproba fiansa pa Aruba ta confrontando reto

ORANJESTAD – Tin posibilidad cu e reunion diabierna awor den Conseho di Minister di Reino Hulandes (RMR) no ta continua manera planea. Of, cu por tin cambio den e agenda. Minister plenipotenciario pa Aruba na Hulanda Guilfred Besaril por a solamente confirma (na noticiacla.com) cu RMR no ta kedando cla cu e documentonan necesario. “Pa nos hiba e discussion mas a leu mester tin algo preto riba blanco”, Besaril a bisa. Segun e mandatario, un punto di agenda ta mara na cierto reglanan. “E principal cu tur documento mester keda entrega na tempo pa tur partido por analisa y hiba e discussion necesario prome cu e bini den e RMR” Besaril a bisa e portal aki. Aki ta trata e documentonan cu ta referi na e condicionan nobo pa Aruba haya e fiansa. 

NO TA CLA AINDA

Pero e punto cu mester discuti diabierna cu Aruba, parce cu no ta cla ainda, y si esey ta e caso, tin chens cu e no ta bay riba agenda pa wordo discuti. Ki consecuencia esaki por tin, no ta conoci. Manera ta conoci, diabierna awor decision mester a cay di RMR si Aruba ta haya su siguiente fiansa (204 miyon florin), pa por atende cu e crisis di COVID-19. Prome minister Evelyn Wever a bisa dialuna ainda cu e colegio di supervision financiero CAFt a manda su aprobacion pa Aruba haya e placa. Awor ta keda na RMR pa aproba esaki.

CONDICION NOBO 

Problema ta cu, banda di e aprobacion aki (cu normalmente mester a sigui sin problema), a bin dos condicion cu ta cu Aruba mester  acepta pa bira parti di e Ley di Reino riba supervision financiero, y cu Hulanda ta bin cu un organo independiente pa maneha e fiansa di likidez. Pero e documentonan aki ainda no a keda presenta na Aruba pa por discuti esaki. Nota:  E potret ta di e sala unda cu RMR na Hulanda ta reuni. Cortesia: sgeschiedenis.nl/node/17286