AZV ta sugeri pa introduci eigen bijdrage pa e.o. remedi

ORANJESTAD – Si e plan di reduccion di gasto di AZV keda aproba, esaki por nifica cu abo tin cu bay contribui cu p.e. 5 florin, cada bez ora cu bo busca bo remedi cu recept na botica. Esaki ta nifica cu si bo tin 5 remedi, bo tin cu paga 25 florin di bo mesun saco, 10 florin pa cada bez bo bishita specialista, y 1 florin cada bes bo haci un test di laboratorio. Ademas remedinan manera paracetamol, no ta wordo cubri mas tampoco. E ta parti di un lista di medida (cu a cay den man di noticiacla.com) unda cu AZV ta sugeri pa implementa pa y corta 5 miyon na gasto manera cu Hulanda a obliga Aruba haci, y a cambio e ta fia Aruba placa pa cubri e COVID-19 crisis. Segun vocero di AZV Solange Tchong, decision final sinembargo no a cay ainda, Gobierno mientrastanto a confirma na noticiacla.com cu ta trahando pa si e ley aki pasa, e no afecta un grupo vulnerable (grupo di menos entrada). 

CONSECUENCIA

E consecuencia cu esaki por tin ta cu hendenan lo pensa dos biaha prome cu nan busca un remedi, y por te hasta bay den extreme cu nan ta opta pa no busca remedi e ora. E consecuencia di esey ta cu sin remedi, e persona no por cura y su situacion por empeora, creando un situacion medico cu na final di dia, por crea aun mas gasto pa AZV. Y ta net esaki ta loke cu gobierno (y AZV) no kier. Noticiacla.com a  compronde cu p.e. na Corsou, e eigen bijdrage ta ‘apenas’ 1 florin, y esey caba aparentemente ta un problema, unda cu hende no kier y/of por paga esaki y a stop di busca remedi pa e motibo ey. Y algun botica na Corsou a confirma cu esaki enberdad ta un problema. Aki na Aruba, tambe a vocifera e preocupacion ey. 

REACCION AZV 

AZV a sugeri e cambionan aki como parti di ehercisio haci pa reduci gasto. Nan a confirma na e portal aki cu e ehercisionan aki ta parti di e plan pa corta 5 miyon na gastonan di e organo di seguro medico. Pero e decision tin cu wordo tuma pa gobierno y Parlamento. Nan ta ehempelnan cu AZV ta menciona, pero pa nan drenta na vigor, gobierno mester cambia e ley pa Parlamento pasa pa e por bira un realidad. Y esey ainda no ta e caso. Pues ta keda pendiente proximamente pa esaki pasa, posiblemente cu forza retroactivo. Y ta keda pendiente pa wak si e comision di zorgtoeslag por keda cla cu e plan pa e grupo vulnerable no keda afecta cu e plan di eigenbijdrage aki.