Comision trahando pa yuda grupo vulnerable ‘bypass’ eigen bijdrage

ORANJESTAD – E comision institui pa gobierno, esta e ‘Comision Zorgtoeslag’ tin dos siman pa bin cu un conseho definitivo con pa asisti e ‘grupo vulnerable’ den comunidad cu lo no por paga e ‘eigen bijdrage’ pa p.e. remedi, unabez e regla aki keda implementa pa gobierno y AZV. Asina minister di Salud Dangui Oduber a bisa noticiacla.com. E organo di seguro medico AZV riba presion di Hulanda, a propone na gobierno pa bin cu eigen bijdrage pa entre otro remedi, bishita di docter y laboratorio. E proposicion aki sinembargo lo afecta egrupo basta grandi di persona den comunidad, considera como e ‘grupo vulnerable’. 

E PROPOSICION

E proposicion ta parti di e asina yama ‘Wave 3’, cu ta encera entre otro un ‘eigen bijdrage’ di 5 florin pa receta, 1 florin pa test di laboratorio, 5 florin pa fysio, 10 florin pa specialista, y te hasta remedinan di cuido propio manera paracetamol. Pues tur esakinan, e ‘pashent’ mes tin cu ‘yuda’ paga p’e. E formula aki ta pa asina e pashent yuda carga mas di e peso di e gastonan medico, y kita esaki for di ‘lomba’ di AZV. E intencion ta pa esaki bira parti di e forma con gobierno lo por scapa placa, y cumpli cu e exigencia di Hulanda. Hulanda a pone condicion cu AZV mester baha gasto, pa asina Aruba por haya placa fia di Hulanda pa yuda cu e COVID-19 crisis.

GRUPO VULNERABLE

Introduccion sinembargo di e medidanan aki, lo crea un problema pa e grupo menciona, y por conduci cu p.e. nan lo no sigui busca remedi (na botica), cu e resultado cu nan lo sigui malo, y crea un peso aun mas grandi riba AZV. “Esey nos no kier tampoco como gobierno” Oduber a bisa e portal aki. E portal aki a compronde cu p.e. na Corsou unda cu e eigen bijdrage ta 1 florin pa remedy, y asina mes hendenan no por paga esaki. Oduber ta papia di un ‘afremmend effect’ cu ta funesto. 

SOLUCION

Pa e grupo vulnerable aki, e comision lo tin cu bin cu un solucion pa cuminsa wak ken e grupo aki ta, y con nan ta bin na remarke pa un zorgtoeslag y cuanto esaki lo bira y kico ta bira e procedura na momento cu haci un peticion pa esaki. “Nos kier keda percura pa esnan vulnerable, na tur momento e cuido wordo brinda, remedy, tur test ta acesibel pa nan” Oduber a bisa