Corte Supremo na Merca a para decision di Trump pa stop proyecto Dreamers/DACA

WASHINGTON – Corte Supremo di Merca diahuebs a vota cu Gobierno Mericano (lesa: Presidente Donald Trump) no por para e programa di imigracion conoci como DACA, Deferred Action for Childhood Arrivals of Dreamers, cu ta afecta por lo menos 800 mil mucha. E ta un programa di tempo di presidente Barack Obama cu ta permiti individualnan cu a yega Merca den forma ilegal, por haya un tempo di dos aña pa cual nan no ta wordo deporta, y bira eligible pa un permiso di trabou. Trump kier a para esaki y a duna orden pa haci tal. Sinembargo, Corte Supremo cu 5 vota pro y 4 contra, a rechasa e decision aki. 

ARUBA TAMBE TIN DREAMERS

Na Aruba tambe na juni di 2017 e Departamento di Integracion y Maneho di Admision di Stranhero (DIMAS) a introduci un proyecto asina yama Dreamers, cu tambe a haya hopi acogida. A registra por lo menos 888 persona cu lo a cualifica pa e proyecto aki. Sinembargo inicialmente, esaki a keda comprendi robez pa cual a surgi un situacion confuso na inicio di su introduccion.