Total di 888 persona a mustra interes pa haya un permiso Dreamers

ORANJESTAD – Un total di 888 persona a mustra interes pa haya un permiso Dreamers. Asina NoticiaCla a compronde di e director di DIMAS Kathy Ruiz Paskel. Manera ta conoci, den e lunanan di mei y juni di 2017 DIMAS a ehecuta e Proyecto cu a carga e nomber di Dreamers. E proyecto Dreamers ta dirigi su mes riba personanan cu por comproba di un of otro manera cu nan tin alomenos 10 aña residencia aki na Aruba y di cual nan a pasa un minimo di 5 aña aki na Aruba siendo un menor di edad.

FORMULARIO

Un total di 1025 formulario di registracion pa e proyecto Dreamers a keda entrega dentro di e termino cu a stipula pa e proyecto, pues promer cu 1 di juli 2017. Si desconta e formularionan di personanan cu a entrega mas cu un formulario pa cita (= 137), e saldo ta bira 888 persona cu a mustra interes pa bin na remarca pa e proyecto Dreamers.

Te na e momentonan aki tin un total di 583 aplicacion formalmente entrega na DIMAS pa bin na remarca pa un permiso firma indefini bou di e proyecto Dreamers. Di e 583 peticionnan aki a honra un total di 349 peticion, a nenga un total di 21 peticion y tin un total di 213 cu ainda ta den tramite. Di e total cantidad di peticion te awor por constata cu 52% ta menor di 18 aña, 48% di e personanan ta entre 18-39 aña y tin dos caso di personanan cu ta riba 60 aña. Di e total di peticion registra te awor 48% ta hende muher y 52% ta hende hombre.

NACIONALIDAD

E top 5 di e nacionalidadnan cu a aplica ta forma e total di 80% di e aplicacion nan:

Colombiano (34%) ,

Venezolano (16%),

Dominicano (16%),

Haitiano (7%),

Jamaikino (7%).

FINALISA CITA

Pa dialuna, dia 24 di juli 2017, DIMAS lo a finalisa pa comunica cu tur persona cu a aplica pa un cita pa Proyecto Dreamers den e lunanan mei y juni y di cual a logra di comproba den un screening preliminario cu posiblemente nan ta cay den e cuadro cu a defini pa e Proyecto Dreamers. DIMAS ta apunta un cita pa e persona bin DIMAS riba un ora y dia specifico pa asina presenta tur e comprobantenan y demas rekisitonan y entrega formalmente nan peticion pa bin na remarca pa un permiso pa tempo indefini bou di e proyecto Dreamers.

Demas personanan cu a mustra interes pa e proyecto Dreamers, pero cu pa un motibo of otro, finalmente a resulta di cu nan ta cay pafor di e cuadro defini pa e proyecto Dreamers (te awor: 10%) y cu a constata esaki sea den un fase preliminar (screening administrativo) of sea nan a haya un negacion riba nan aplicacion entrega pa un permiso Dreamer, DIMAS por informa lo siguiente. DIMAS lo procede pa invita e personanan separadamente pa individualmente suministra nan cu informacion relevante y tambe guia encuanto di cual titulo di estadia temporario (regular) nan posiblemente lo por bay aplica p’e considerando nan caso particular y pa haya un splicacion di e proceso y tambe tur e rekisitonan cu ta coresponde cu e producto ey.

E permiso di estadia indefini duna bou di e Proyecto Dreamers ta duna derecho na un estadia legal indefinitivo na Aruba, tur es tempo cu ta keda biba aki na Aruba.

Pa loke ta trata e posibilidad di adkisicion di e derecho pa obtene e nacionalidad Hulandes por medio di naturalisacion (of opcion), mester tene na cuenta cu esaki no ta un competencia di Gobierno di Aruba, sino ta trata di un competencia di Reino. Ta trata di dos trayecto separa, y cada un tin nan mesun leynan y reglanan aplicabel. Pa mas informacion encuanto con pa bin na remarca pa e nacionalidad Hulandes, por acudi na Gabinete di Gobernador.