AZV ta reacciona: E caso Bermudez ta medicamente hopi complica

ORANJESTAD - E caso cu noticiacla.com a raporta ariba diaranson mainta, di e yiu di crianza di señora Ana Bermudez, ta un caso medicamente hopi  complica. Asina AZV a reacciona pa e portal aki diaranson atardi. Segun e reaccion,  actualmente AZV tin algun pashent ainda na Colombia. Entre nan algun caso sumamente excepcional debi na nan condicion medico. Tambe ta hunga un rol e hecho cu no por trece tur bek Aruba pa motibo cu no tin e cuido medico specifico cu e pashentnan aki ta rekeri di dje. “ AZV mester tuma decisionnan dificil despues di a haya e instruccion di Hulanda pa corta e gastonan di AZV cu 5 miyon florin pa luna inmediato. Dentro di esaki, AZV a analisa tur scenario y a scog’e pa percura cu e tratamentonan medico ta keda lo mas intacto posibel”, e vocero di AZV a sigui bisa. “ Bisando esey, AZV a opta pa corta den cosnan cu pa algun aña AZV a duna pero cu realmente no ta un obligacion di AZV pa duna pa motibo cu esaki no ta stipula den Ley AZV. Un di esakinan ta e aporte financiero, esta e daggeldvergoeding cu AZV ta duna pashent y of acompañte social ora nan bay pa cuido medico den exterior. Awor AZV mester a tuma un decision pa corta e daggeldvergoeding di pashent cu 50%”.

ELIMINA DAGGELD VERGOEDING 

Adicionalmente AZV mester elimina e daggeldvergoeding di e acompañante social por completo, unda ta importante pa tene na cuenta cu e daggeldvergoeding no ta un entrada. E ta un aporte cu a wordo duna den temponan bon y for di punto di bista social / humanitario.

CASO COMPLICA

Pa loke ta e caso specifico di e yiu di crianza di señora Ana Bermudez, AZV ta haye un caso medicamente hopi  complica. “ Y aunke AZV no ta gusta comenta tocante niun cliente / pashent publicamente toch ta haya cu ta na su luga pa duna un reaccion cortico. Hustamente pa e motibo aki y pa hopi otro pashent, e enfoke di AZV ta keda riba percura pa e cuido medico cual e asegurado / pashent  tin derecho riba dje keda intacto”.

OPORTUNIDAD

Y na final, AZV ta bisa cu awor ta keda na AZV -un biaha mas e oportunidad manera cu a haci den pasado te cu awor- pa bay papia cu e voogd oficial di e mucha pa asina yega na un solucion pa e caso aki, cual solucion AZV ta premira cu lo mester wordo busca den otro area.