Medida anuncia pa AZV a cuminsa afecta pashentnan den exterior caba

ORANJESTAD/ CALI – E medidanan cu Uitvoerings orgaan AZV a anuncia recientemente relaciona cu reduccion di gasto riba exigencia di Hulanda, a cuminsa afecta pashentnan caba de exterior. Ta trata specificamente di e eliminacion di daggeld pa acompañantenan di pashent den exterior, y e reduccion di e cantidad di daggeld cu pashentnan mes ta ricibi. Algun a informa noticiacla.com caba, cu e medida aki, ta desastroso pa nan. Hulanda recientemente a exigi di gobierno di Aruba pa reduci 5 miyon mensual di AZV, como condicion pa por ricibi mas ayudo financiero relaciona cu e crisis di COVID-19. 

NOTIFICACION

Den e caso aki ta trata di personanan cu ya caba ta den exterior y cu a haya notificacion caba di AZV di e cambionan. Den un caso particular, ta trata di un mama soltera cu tin un yiu como pashent y ta na Colombia desde December 2019. E ta raporta cu debi na e medida recien anuncia, su situacion di bida eynan ta di tal forma cu nan ta luchando mas ainda pa sobrevivi. E persona en cuestion, Ana Bermudez, a informa e siman aki na noticiacla.com di e caso di su yiu di crianza di 4 aña, Eva cu a wordo manda pa Cali, Colombia pa ricibi cuido medico cu na Aruba no por wordo duna. Eva ta un mucha cu paralisis Cerebral. E no por cana, sinta, papia, ni come via boca. E tin un traqueostomi?a y un gastrostomi?a. Loke ta haci cu Aruba no por dune un continuidad na e tratamento cu e ta ricibi aki na Cali. “ Pa e motivo aki, nos mester keda di un forma indefini akinan na Cali. Esaki no ta nos decision, pero ta e circumstancia nan a haci cu nos mester keda te na e momento cu e por wordo decanula( hala rosea di su mes) y Aruba por duna continuidad na su tratamento” e mama ta sigui bisa.

AZV A NOTIFICA NAN 

Siman pasa caba (Aruba mes a keda informa dialuna ultimo di e cambionan) e mama a han?a un comunicado di parti di Oficina Internacional di Clinica Valle de Lili, unda cu nan a informa e mama cu AZV no ta paga mas daggeld ni pa e acompan?ante( den e caso aki esey ta e mama), ni pa e pashent cu ta usa peg(den nos caso aki e yiu Eva). “Esaki kiermen cu nos no ta bay ricibi nada y cu nos no ta bay tin niun manera pa survive aki na Cali” e mama ta sigui bisa. Segun e mama, como mama soltera e no tin niun ayudo di gobierno, ni por traha. “Mi yiu ta depende 100% di mi. Dus esaki kiermen cu mi no por bay laga mi yiu su so door di su condicion. Pero tampoco mi por keda muri di hamber akinan” e mama ta sigui bisa. Segun e ta sigui conta, el a tuma contacto cu tur esnan en cuestion, di director di AZV te cu ministernan (varios), pero no a haya contesta. 

CONCIENTE DI E SITUACION

E mama ta conta cu e ta hopi conciente di Aruba y AZV su situacioon, y ta compronde cu nan mester tuma cierto medida, pero, esaki ta un caso extraordinario, unda cu nan no por manda e mucha bek Aruba. “No paso nos no kier, pero pasobra nan no por dune cuido medico ayanan” e mama ta sigui bisa. “Boso no tin idea di tur e stres, sufrimento, dolor, preocupacion, deseperacion cu henter e situacion aki ta causando na e mamanan di pashentnan aki na Cali. E ta splica cu e no ta e unico, ya cu tin 3 mama mas cu nan yiu special of cu cancer cu ta pasando den e mesun situacion cune.

REACCION DI MINISTER

Despues di tuma nota di e caso aki, noticiacla.com a tuma contacto cu e mandatario encarga cu salud, Dangui Oduber cu a reacciona pa e portal aki riba e caso aunke mas den un tono general dia. E ta conciente di e problema cu e medidanan aki ta causa, pero ta mustra riba Hulanda cu nan ta esnan cu a bin cu esaki y awor Aruba tin cu sinti esaki. “Gobierno a institui un comision cu lo bin cu un conseho na gobierno riba e introduccion di “zorgstoeslag” pa diferente casonan” Oduber a cuminsa na bisa. “Tur decision cu nos tuma ta haci dolor, tur decision tin consequencia pero e decisionan aki nos ta wordo obliga pa tuma. Na ningun momento nos como gobierno a pensa di bai corta den AZV hustamente den tempo di crisis”. E mandatario a sigui bisa. “Nos a purba tur manera pa convence Hulanda otro y lamentablemente nan ta keda para ariba cu mester reduci y corta gastonan di AZV. Nos a splica nan riba e consequencianan, nos a manda carta y nos a keda insisti riba e timing cu no ta cuadra cu e realidad cu nos pais y hendenan ta bibando aden”. Segun Oduber, nan (gobierno di Aruba)  a bisa semper cu den tempo di crisis di salud no ta e momento pa corta hustamente den azv. “ E gobierno di Hulanda ta mira esaki diferente y segun nan e gastonan di AZV ta demasiado halto!” Oduber a finalisa bisando. NOTA: E potret ta di e mama Ana Bermudez y su yiu Eva na Colombia. Pa esnan cu kier yuda, por click riba  www.helpeva.org