Docentenan di Paso pa Futuro a protesta plan di mudansa

ORANJESTAD – Docentenan di e scol pa muchanan special,  Paso pa Futuro diaranson merdia a bay den accion pa protesta decision di minister pa muda pa un otro localidad. Un localidad cu segun nan abogado Desiree Croes, no ta apto y of adecua pa nan. Mitar di e scol tin cu bay na edificio na Seroe Blanco unda ex de Schakel tabata, mitar tin cu bay na Santa Cruz na SPO. Pues e scol tin cu wordo parti den dos locatie awor. Tur esaki siendo cu prome minister di Aruba Evelyn Wever Croes mes a anuncia cu ta para e cambio aki. Aparentemente minister di enseñansa Rudy Lampe ta manda carta rond pa sinta cu e docente y cabesantenan pa atende cu e cambionan. A compronde cu e minister kier a switch dos scol, pa asina uno haya un localidad mas grandi mientras cu esnan d Paso Pa Futuro (mas chikito den cantidad di alumnno) ta bay den e otro edificio. Paso Pa Futuro ta un scol funda na 2004 pa muchanan cu deficiencia den nan abilidad regular pa siña y ta traha mas riba na abilidad practico. Como tal e scol ta ekipa pa tal operacion di e scol. Na e otro localidad, esaki no ta e caso y mas bien tin cu bay adapta e otro edificio pa cumpli cu e rekisitonan aki.