Gobierno a revoca decision di ‘fusering’ di varios scol na Aruba

ORANJESTAD – Den un intento pa trece paz y trankilidad bek den mundo di enseñansa na Aruba, gobierno a ‘draai bek’ desicionan tuma pa minister di enseñansa Rudy Lampe. Entre e decision, ta conta e decision pa fuseer varios scol cu otro y comberti e scolnan publico den scolnan priva. Esey sinembargo no ta tuma lugar mas. Asina prome minister Evelyn Wever a anuncia diabierna anochi durante e briefing pa COVID-19. E mandatario mientrastanto ta sigura cu e decision tabata tuma hunto cu minister Rudy Lampe. E realidad ta cu e ideanan di e mandatario a wordo ‘teruggedraaid’ debi na e inquietude causa pa e decision di Lampe. 

E CAMBIONAN

Entre e cambionan anuncia diabierna anochi, ta conta cu Scol Fontein y Hilario Angela ta keda scolnan publico. Tambe Scol Paso pa Futuro y Emma School ta keda scolnan apart, pues riba nan mes y no ta fuseer mas tampoco. Ceque College Mavo tambe ta keda scol publico mescos cu ta e caso di Juliana School. Abraham de Veer school ta keda publico y no ta fuseer mas cu John Wesley, pero si lo tuma un tempo di 12 luna pa evalua cu nan lo por yega na un tipo di cooperacion. Uno hopi grandi, tambe ta e hecho cu EPI no ta bay cay mas bou di Stichting EPB. 

DPS

E unico cambio cu ta sigui ta e structura na DPS, (Directie Publieke Scholen) unda cu e motibo principal lo ta e aspecto financiero. Tur e cambionan sinembargo lo tuma lugar cu ayudo di esnan cu ta traha eynan, pa asina tur cos cana bon.