Wever: Prematuro pa specula riba un di dos lockdown caba

ORANJESTAD – Gobierno no ta descarta un di dos lockdown, aunke ta prematuro pa specula riba esaki awor. Asina prome minister Evelyn Wever Croes a bisa relaciona cu e preocupacion di AHATA riba un di dos lockdown relaciona cu e crisis di coronavirus COVID-19. Ademas Wever ta sigura cu no ta bay usa fondonan genera pa cubri e posibel pago di seguro di biahe di turista, pa cubri deficit di AZV. Esaki tambe tabata un preocupacion di AHATA. 

E PREOCUPACION

Den un carta dirigi na e prome mandatario, AHATA ta mustra su preocupacion pa un di dos lockdown, y ta pidi e mandatario pa evita esaki, ya cu e lo por tin consecuencia economico mas pio cu e prome lockdown. Noticiacla.com a acerca e mandatario riba e tema e ora. “ Si despues di cu Aruba habri frontera awor, tin necesidad pa un di dos lockdown, lo depende di e circumstancianan y desaroyonan di e momento ey. Asina   Wever Croes a contesta e portal. “Nos ta keto bai den e prome lockdown y ta den deliberacion cu stakeholders y den preparacion pa kita e lock down si e desaroyo ta permiti” e mandatario a sigui bisa. 

PROME LOCKDOWN

Tabata dia 15 di maart ultimo cu gobierno a anuncia e prome lockdown (cierre di frontera) cu lo a drenta na vigor dia 17 di maart 2020. Un paso historico cu nunca antes no a tuma lugar, cu excepcion di un siman despues di 9/11. Pero e tempo ey ta Merca a prohibi tur su avionan di bula, cu a pone cu pa un siman avionan mericano no por a move. E lockdown di Aruba pa cu e virus a keda vigente te 19 di april ora cu a dicidi cu ta prolonga esaki te 31 di mei. For di e tempo ey no a prolonga esaki mas, y awor ta anuncia cu ta mustra cu pa 15 di juni proximo lo por habri frontera di nobo.