AHATA ta preocupa pa un di dos ‘lockdown’ pa COVID-19

ORANJESTAD – Aruba Hotel & Tourism Association (AHATA) ta preocupa pa un asina yama ‘second lockdown’ pa motibo di COVID-19. Esaki nan ta bisa minister di turismo Dangui Oduber den un carta awe diaranson cu noticiacla.com tin den su poder. Segun e CEO di e asosacion Tisa LaSorte, un di dos lockdown lo ta mas destructivo pa nos economia cu e prome. “Nos ta di acuerdo cu e prome lockdown tabata necesario, pero nos kier enfatisa cu nos mester evita un di dos ora cu un di dos ola (di e virus) sosode ” LaSorte ta bisa. Esaki tabata e preocupacion durante reunion di tur e gerentenan general di hotel na Aruba e siman aki. 

MESTER TRANSPARENCIA

AHATA ta pidi como tal, pa tin transparencia prome cu anuncia un fecha di e reapertura di frontera riba por lo menos 4 punto. Entre nan, riba e inventario di camber disponibel na Aruba pa isolacion y cuarentena di bishitantenan na propiedadnan diferente di acomodacion unda cu bishitantenan saludabel ta kedando. AHATA ta sigura cu a yuda pa busca un localidad pa cuarentena, y ta ofrece cualkier otro tipo di asistencia. Tambe meter sa e capacidad di e sistema di salud pa casonan di COVID-19. Un otro punto, ta e formula exacto cu autoridadnan ta usando pa determina ora cu un di dos lockdown bira necesario. Y finalmente, kico e plan exacto ta pa sigura cu un di dos lockdown no ta necesario. 

RECOMENDACION

AHATA a recorda e mandatario di nan recomendacion pa rekeri pa tur bishitante tin un prueba cu nan a test negativo pa e virus, prome cu nan aborda nan buelo pa Aruba. Esaki ta reduci e cantidad di bishitante pa Aruba, pero ta reduci tambe e posibilidad di casonan positivo riba e isla, cu por afecta e salud publico. “Si e rekisito aki no ta posibel pa autoridadnan, nos ta spera contestanan cla riba e 4 preguntanan haci prome cu anuncia reapertura di e frontera” LaSorte ta bisa. 

SEGURO DI BUELO

Mientras cu AHATA ta di acuerdo cu gobierno pa pidi turistanan cera un seguro di biahe cu ta inclui cobertura pa e pandemia, hunto cu eventual cancelacion di buelo y gastonan medico, nan ta fuertemente opone cu e plan potencial di gobierno pa introduci un suma adicional di e turista ora cu e ta na Aruba (un tipo di belasting extra) pa cubri e seguro aki. 

PAGA E SEGURO 

Pa loke ta e seguro di biahe, segun AHATA, esaki mester wordo paga pa tur bishitante cu bishita Aruba, y no solamente huespednan di hotel. Tin un falta di conocemento di gobierno di e acomodacionan alternativa y un falta di conocemento di cumplimento completo di pa pago di cierto impuesto pa e acomodacionan aki. Tambe e seguro di biahe mester ta paga prome cu biahe cuminsa, y ubica riba e carchi di turista of presenta ora cu e turista yega aruba. E mester por mustra e prueba aki ora cu e yega Aruba, mescos cu ta e caso di un visa. Ademas mester paga e seguro aki directamente na e agencia di seguro di biahe y no administra via sector publico y un impuesto nobo. AHATA ta contra cu un tipo di impuesto asina lo por wordo usa pa cubri gastonan di gobierno pa e.o. AZV y of hospital. Pa lesa e carta completo aki, lesa AKI.