Lampe: Ta imposibel pa hala tur decision atras riba enseñansa

ORANJESTAD – “Ta pidi pa hala tras tur decision, pero esei ta imposibel pa cumpli cu ne, tur decision” Asina minister di enseñansa Rudy Lampe a bisa noticiacla.com dialuna anochi reaccionando riba declaracion di sindicato SIMAR. Presidente di e sindicato Josephine Albertus a bisa e portal aki cu e minister a nenga di hala tur decision cu el a tuma, atras pendiente un continuacion di combersacion y pa nan haya ‘inspraak’ den varios di e temanan. E mandatario pues ta bisa cu e peticion aki ta imposibel.

PAKICO NO POR HALA DECISION ATRAS

E mandatario ta splica su razonamento pakico ta dificil pa cumpli cu e peticion di e sindicato. “ Con mi por hala atras mi decision di pidi Hulanda pa reconoce nos einddiplomas door cu e aña aki no tabatin centrale eindexamens?” e mandatario ta cuminsa puntra. “ Con mi por hala atras mi decision di uitbreiding di DPS primaire scholen cu ta den ehecucion den region di Noord y Playa unda e leerlingenpopulatie mas a crece? E no ta posibel cumpli cu un demanda asina cu a pidi pa para tur decision!” Lampe ta sigura e portal aki.

E REUNION

Pa loke ta e reunion complete mes, Lampe a enfatiza na e portal aki cu el mustra su disponibilidad di dialogo. “ Y mi a propone un concepto protocol di dialogo riba base regular cu sindicatonan y mi ta spera cu pa otro siman nos por yega na un acuerdo riba esak” Lampe a continua bisando. “Mi a presenta tur documento relevante ter inzage y den curso di e siman aki lo load tur documento riba website di directie onderwijs pa tur hende por consulta” e mandatario a sigui bisa. Pa e mandatario, segun el a splica e portal aki, ley di transparencia ta importante. “ Y pesey mi ministerio ta practica transparencia den pone disponibel rapportnan cu ta e base di decisionnan” e mandatario a finalisa bisando. E mandatario lo ta den Parlamento diamars mainta pa contesta preguntanan di parlamentarionan riba e tema di enseñansa.