Tjon: Ponencia di Knops cu Aruba no por carga su autonomia, ta falso

ORANJESTAD - E ponencia di e secretario di estado Raymond Knops, cu for di hopi tempo tawata bisto cu Aruba no por carga su autonomia ta eroneo y falso. Asina lider di fraccion di MEP Rocco Tjon ta bisa den un articulo. Noticiacla.com ta resumi parti di e articulo aki. Pa loke ta e desacuerdo cu Knops, Tjon ta referi na e declaracion di Knops den un carta cu el a manda pa Tweede Kamer riba e fianza cu Aruba a ricibi recientemente contra condicion serio. Aki ta unda cu Knops a bisa cu Aruba, St Maarten y Corsou danki na coronavirus a demonstra cu nan no por carga nan autonomia. Noticiacla.com a raporta riba e topico aki tambe e siman aki. 

NO TA DI ACUERDO

“ Na prome lugar ta importante pa vocifera cu nos no ta di acuerdo cu e ponencia di sr. Knops cu Aruba no por carga nan propio autonomia” Tjin ta bisa. Segun Tjon, Sr. Knops mester compronde cu e constelacion di estado di e tres paisnan Caribense den Reino ta completamente diferente. Aruba nunca a haya placa di Hulanda of a fia placa di Hulanda. Segun Tjon Arubianonan a paga pa haya nos autonomia. E ta repasa e situacion financiero cu Aruba lo a laga (gabinete Oduber) na 2009 y con gabinete Wever Croes a drecha e situacion cu nan a haya na 2017 bek te haya surplus, solamente pa COVID-19 daña tur cos. Pues e ponencia di e secretario di estado Knops cu for di hopi tempo tawata bisto cu Aruba no por carga su autonomia ta eroneo y falso.

ENTIDAD NOBO PA CONTROLA

Pa loke ta e entidad nobo cu Hulanda kier bin cu ne pa controla fondonan cu e ta fia nos islanan, tambe Tjon tin problema cu ne. “ Pues nos ta paga pa haya e placa necesario y na mes momento Hulanda ta dicidi riba e fondonan aki. Constitucionalmente esaki no por y nos no lo acepta esaki tampoco. Ta hopi importante pa Hulanda no maluza e situacion actual. E situacion di e paisnan ta diferente qua constelacion huridico pero tambe pa loke ta e situacion financiero” Tjon ta sigui bisa.

PA CONCLUI

E hecho cu e gabinete actual a maneha fondonan bon, ta algo positivo segun Tjon y a cumpli cu palabracionnan haci cu Hulanda. Pues no lo acepta cu e situacon actual ta wordo maluza door di Hulanda pa touch cu nos autonomia. “Ley ta conta pa Hulanda tambe!” Tjon a finalisa bisando entre otro. Lesa e articulo orginal AKI.