Coronacrisis a prueba cu Aruba, Corsou y St Maarten no por carga nan propio autonomia

DEN HAAG – " Door di e crisis di coronavirus, nos ta mira loke tabata visible masha tempo caba. Esta cu e paisnan (Aruba, Corsou y St Maarten) no por carga nan propio autonomia". Asina secretario di estado Hulandes Raymond Knops ta bisa den un carta pa Tweede Kamer unda cu e ta relata e ayudo financiero pa e islanan en cuestion. Segun Knops, e crisis aki ta mustra con vulnerable e islanan ta. Mes momento e ta mustra tambe si con Hulanda ta solidario cu e islanan. 

IMPACTO

Segun Knops den su carta pa Tweede Kamer, e paisnan autonomo menciona awor ta  purbando di atende cu e consecuencia di e crisis. Entre nan, a haci un peticion comprendibel riba e solidaridad dentro di Reino. A mustra cu den e periodo cu a pasa caba Hulanda como socio den Reino a asisti mas hopi cu ta posibel. Pero mes momento mester a tene bon na cuenta pa ken e solidaridad ta destina. A mustra cu tin un distancia grandi entre esnan cu ta bon y esnan cu ta mal para. Y e distancia aki a aumenta aworaki cu e crisis. Segun Knops, e solidaridad tin cu funciona pa ambos banda. Cu esaki Knops kier men cu e islanan di Caribe menciona mester implementa reformanan necesario pa por fortifica e forza di resistencia (contra crisis). Cu esaki, e kier men cu mester tuma medida pa fortifica e structura social economico pa asina e uso di placa di belasting Hulandes ta concudi na mehoracion responsabel. Sin e tipo di medidanan aki cu tin cu fortifica e resiliencia di e comunidad riba termino, no tin sentido pa awor ofrece sumanan financiero disponibel. Lesa e carta completo AKI.