E turista cu yega Aruba lo no mester bay den cuarentena

ORANJESTAD – Turistanan cu cuminsa bin Aruba ora cu frontera habri, no mester bay den cuarentena pa 14 dia. Asina minister di turismo Dangui Oduber a confirma pa noticiacla.com diamars atardi. Esey ta diferente cu con e isla bisiña Corsou kier atende cu nan situacion. Manera cu e portal aki a raporta mas prome, Corsou si kier obliga su turistanan bay den cuarentena prome, ora cu nan yega e isla. Mientras cu e mandatario di Aruba no a reacciona riba e parti ey, e la bisa si, cu e “no ta kere pa laga un turista bin disfruta na Aruba, y obliga e turista bai 14 dia den cuarentena”. 

ARUBA TA PREPARANDO

Segun Oduber, Aruba ta preparando su mes di e mihor forma posibel pa por pone un fecha definitivo pa habri nos fronteranan. E ta splica cu Ministerio di turismo, salud publico y deporte conhuntamente cu ATA y DVG ta trahando duro riba protocolnan pa e sector turistico. “ Nos naturalmente ta haci conhuntamente cu Ahata, AAA, APA y Atsa pa asina yega na e mihor protocolnan posibel. Nos no ta kere pa laga un turista bin disfruta na Aruba y obliga e turista bai 14 dia den cuarantenta”. Segun Oduber, si tin cu haci esey, e ora no tin sentido pa habri nos fronteranan. “Nos kier pa e turista por disfruta di su vakantie y no pasa esaki sera den un camber. Es mas turistanan ta keda Aruba 6-7 anochi kiermen pa un turista bin keda Aruba 14 dia den cuarentena ta casi imposibel” Oduber a sigui bisa. 

PROTOCOL CLA

E mandatario a sigura cu Aeropuerto tin su protocolnan cla y na un manera transparente lo invita tur medio di prensa pa un “walkthrough” con e procedura lo ta na momento cu un turista yega Aruba. “ Nos lo mustra di ora e turista baha for di avion te pafor di aeropuerto con esaki lo ta. Nos kier limita tur risico cu por tin, nos kier hacie na un forma mas responsabel posibel pa nos communidad por ta trankil y tambe e turistanan cu lo bishita Aruba” e mandatario a bisa. “ Nos tin un clima favorabel y nos ta hopi mihor prepara actualmente. Nos tin cu duna e turista tambe e confianza cu e ta safe na Aruba, cu controlan estricto ta tuma lugar y ta socialmente responsabel pa viaha y goza di nan vakantie. E no ta un tarea facil pero nos ta trahando hopi duro riba esaki” Oduber a finalisa bisando.