No por cumpli cu peticionnan di sindicato di polis

ORANJESTAD – Sindicato di polis SPA, no a logra convence gobierno pa regla dos asunto pendiente pa nan diamars. Despues cu e sindicato su miembronan a reuni mainta entre nan mes, nan a acudi na Bestuurskantoor unda cu nan a pidi gobierno (lesa:ministernan Andin Bikker y Xiomara Maduro) pa regla dos asunto pa nan. Pero despues di algun ora, Maduro a splica e sindicato su presidente Joselito Dirksz, cu e no por cumpli cu su peticion. E sindicato a dicidi di ‘regroup’ y bolbe despues.

E PETICION

E sindicato a acerca gobierno cu dos peticion. Uno tabata pa cambia e regla stipula pa Hulanda pa rebaha salario di e ambtenaar di ‘tot nader orde’ pa e fecha di December 31, 2020 manera cu tabata e caso pa Parlamento y ministernan. Esey tabata e ley cu a pasa anteriormente pa Parlamento. Pero despues di diabierna ora cu Hulanda a impone condicion riba Aruba pa acambio fia placa, Hulanda a pone como condicion cu e reduccionan mester ta ‘tot nader orde’, esta te proximo aviso, envez di un fecha fiho. Maduro a splica cu esey ta un condicion cu Hulanda a pone y cu Aruba no por haci nada cu esey. Si Aruba no cumpli, e lo no haya e placa cu consecuencia cu e no por cumpli cu su obligacionan financiero, cu ta e.o. pago di salario. E otro peticion tabata pa regla e reduccion di salario den un ley apart, envez di hacie manera cu gobierno a informa. Maduro aki tambe a bisa cu lamentablemente no por cumpli, ya cu no ta trata di un solidariteits belasting pa cual por pone esaki solamente pa un grupo. Pues ta tur hende tin cu haya esaki mescos, y como tal no por haci un excepcion djis pa e grupo di polis. Cu esaki, gobierno a splica detayadamente pakico no por cumpli cu e peticion di e sindicato. Mira e declaracion di e mandatarionan AKI.