Segun gobierno y fraccion MEP, carta CAFt no mester a lek

ORANJESTAD – Gobierno di Aruba no ta contento cu e ultimo carta di CAFt pa gobierno siman pasa, a ‘lek’ den prensa. Ta trata di e carta den cual presidente di CAFt Raymond Gradus ta relata riba e presupuesto 2020 y e cambionan cu gobierno mester haci. Tanto Antiliaans Dagblad (AD) como noticiacla.com a pone man riba e carta aki siman pasa y a raporta riba su contenido. Pa loke ta e desapunto di e lekmento, prome minister Evelyn Wever dialuna anochi durante e briefing di coronavirus a confirma esey, ora cu a purba contesta e pregunta di e portal aki riba e tema. “E carta akinan di C(A)Ft ta un carta cu a lek den prensa, cu no ta suppose di a cay den prensa. Nos ta lamenta esey” Wever a cuminsa na bisa. “E ta un carta cu no mester a lek”. Lesa e carta AKI. 

FRACCION DI MEPNo ta solamente gobierno, pero tambe fraccion di MEP den Parlamento tin problema cu e hecho aki. Lider di fraccion di MEP Rocco Tjon, tambe a bisa esaki. “ Nos ta asombra cu e matutino (refiriendo na Antiliaans Dagblad:red)  tin e detayenan di e conseho aki caba, mirando cu e no ta publico ainda. Gobierno no a duna nan reaccion, pero ya caba e documento aki su contenido ta conoci. Mes momento Tjon a mustra cu e ta   lamenta e hecho cu partido(nan) ta saca cierto punto di e carta aki for di contexto pa uzo politico.

CONTESTA PREGUNTA

Pa loke ta prome minister su contesta dialuna anochi, esaki tabata riba peticion di e portal aki, pa haya sa kico ta e pensamento riba e contenido di e carta, y no cu e carta a lek. E pensamento di gobierno ta importante, segun e portal aki pasobra e ta pone gobierno riba un otro tarea extra pa cumpli cu ne, durante e tempo di crisis aki. E mandatario sinembargo, a opta pa no toca e contenido di e carta si, y a laga esaki pa su colega di finanza contesta. “Minister di finanza ta trahando riba un contesta pa e carta y ora cu e tin e contesta, e ora nos lo publica esaki tambe” Wever a bisa. 

TRAHA HOPI TEMPO CABA

E unico parti cu e mandatario a contesta si, ta e aspecto cu gobierno inicialmente a basa su mes riba un situacion di crisis di COVID-19 cu lo a dura mas largo (te cu December 2020) unda cu a sali di punto di salida cu mester di placa pa cubri por lo menos te e tempo ey pasobra lo a premira cu te e tempo ey, lo no tin avionnan bahando na Aruba. CAFt a pensa otro y a bisa cu kier un vision poco mas diferente, esta di un situacion di crisis basa riba 3 luna. Wever a confirma cu enberdad na comienso a bay parlamento cu e presupuesto di urgencia pa e periodo ey, pero awor enberdad, ta actualisando e situacion y ta trahando riba un scenario di crisis basa riba menos tempo y awor ta papiando di habri frontera caba pa fin di juni 2020.