CAFT: Gobierno tin 3 siman pa entrega presupuesto adapta

ORANJESTAD – Gobierno di Aruba tin te 31 di mei proximo (3 siman) pa presenta un presupuesto adapta (casi nobo), osea un ‘begrotings wijziging’ na Colegio di Supervision Financiero di Aruba (CAFt). Asina e presidente di CAFt Raymond Gradus ta informa minister di finanza di Aruba Xiomara Maduro den un carta fecha 4 di mei 2020. E matutino di Corsou, Antiliaans Dagblad (AD) a presenta e primicia aki caba den nan edicion di awe mainta. Den e carta di 6 pagina di CAFT, cu Noticiacla.com tambe tin den su poder, Gradus ta haci 9 recomendacion cu mester keda procesa y aparece den e presupuesto ‘revisa’ tambe. Minister Xiomara Maduro mientrastanto a confirma pa e portal aki awe mainta cu e ta trahando riba e contesta pa CAFt y undabez cu e ta cla, lo duna su comentario. 

E CARTA

CAFt kier entre otro pues pa gobierno di Aruba basicamente traha un presupuesto nobo, basa riba e scenario cu e frontera di Aruba lo keda cera pa tres luna envez di e 9 lunanan cu el a basa su mes, (te fin di aña 2020) pa asina por minimalisa e deficit y e crecemento di e debe. Dependiendo cuanto cambio mester haci, esaki por resulta den un presupuesto nobo. CAFt ta tene cuenta cu e situacion actual cu Aruba ta den, y como tal, envez di informa e colegio di con gobierno tin pensa di haci e cambionan, te dia 31 di mei 2020 envez di 18 di mei proximo, cu conforme e ley di LAFt ta e fecha riba cual esaki mester sosode. Pero awor gobierno por duna e informacion ey, y entrega e cambionan hunto pa mas tarda 31 di mei proximo. Den e cambionan ey, gobierno mester procesa e 9 recomendacionan. 

E RECOMENDACIONAN

E recomendacionan (fuera di e parti cu mester adapta e presupuesto riba 3 luna cu den di tres y cuater cuartal, un recuperacion gradual), e mester evalua si algun medida di e reforma fiscal por sigui toch, envez di pospone henter e reforma manera cu gobierno a anuncia. Asina e por crea espacio pa financia e plan di emergencia y procesa esaki den e presupuesto adapta. Tambe CAFt kier pa procesa e loke e ta spaar den e gastonan di personal, bienes y servicio, subsidio y transferencia, pa asina financia e plan di emergencia cu e entrada extra aki. CAFt kier pa substancia e proceso tambe di ehecucion di e medida di e BVP y cuantifica e medidanan cu ta baha e gastonan di personal y presenta periodo di tempo cu esaki lo tuma lugar. Interesante ta tambe cu CAFt ta insisti cu e kier sa di ki forma e beneficionan di e licensia di Cannabis di 15 miyon ta realisabel (Gobierno a inclui den presupuesto cu e lo bende licensia pa produci y exporta Cannabis medicinal na balor di 15 miyon florin). Esaki ta djis algun di e 9 recomendacionan. 

ARUBA NO TA CUMPLI

Tambe gobierno, segun e colegio di supervision financiero, ‘atrobe’ no ta cumpli cu tur e recomendacionan a keda procesa den e presupuesto 2020. Entre nan, pa cuantifica e cambio di gasto di personal. Ademas tambe a constata cu a cancela e reforma fiscal, cu ta haci cu ta bay ricibi menos entrada. E beneficionan tampoco a keda adapta y no tin cobertura. Ademas no tin medida structural pa baha gasto. Cu esaki e necesidad di financiamento ta aumenta, cu no ta deseabel den cuadro di finanzas duradero. 

DEFICIT 

E deficit nobo di e presupuesto entrega, ta sali riba 1.3 biyon florin cu ta resulta den un debe total di 5.603 miyon fin di e aña aki. Manera ta conoci, e deficit spera, ta debi na e medidanan tuma pa e plan di emergencia, caida den entrada di impuesto y deficit na SVB y AZV debi na e crisis di COVID-19. Aki un biaha mas CAFt ta subraya cu e plan di gobierno ta traha teniendo cuenta cu e frontera ta keda cera te December 2020, pero CAFt ta sugeri pa esaki cambia pa uno di 3 luna so.