Banconan na Aruba ta acepta rijbewijs como ID

ORANJESTAD – Establecimentonan financiero no tin problema pa tuma rijbewijs como un documento valido pa identificacion. Esaki un ehecutivo halto di un di e institutonan financiero a confirma na NoticiaCla.com diaranson. “E ta un id oficial cu banconan ta acepta” e director di banco a sigura NoticiaCla.com. Pero pa esaki por tuma lugar, e documento mester contene cierto informacion. “E mester tin potret ariba dje. Mi no a wak esun temporario”, e director a sigui bisa NoticiaCla.com.

Despues cu e mandatario di husticia a declara na NoticiaCla.com cu un rijbewijs no ta un documento di identificacion, esaki a crea un ola di reaccion den comunidad. Un partido politico a bay asina leu di ‘denuncia’ e mandatario publicamente pa su falta di conocemento. Ta trata aki di e politico Andin Bikker. Segun Bikker, su partido Democracia Real ta lamenta cu minister di husticia cu ta supose di conoce e leynan di Aruba den su funcion e ta mal informa pueblo djis pasobra el a haya su mes den un skina caminda e no por a defende su mes, cu e rijbewijs cu e ta dunando awo aki no ta conforme e tratadonan internacional ni ta conforme cu e exigencianan cu pueblo di Aruba y instancianan ta spera di dje.

Parlamentario pa partido MEP, Xiomara Ruiz Maduro tambe a comenta e asunto riba su pagina di Facebook. Segun Ruiz, minister Dowers mester asumi su responsabilidad y stop di tira culpa riba otro. “Su gobierno a malgasta placa y awor pa cosnan necesario no tin fondo pa cubri nan. Y e mester bay mira cu den ley (cu e mes ta responsabel pe) e rijbewijs ta wordo uza como medio di identificacion. Pues e no por core pa e consecuencia aki di e mal maneho di dje y di su colleganan di Gabinete Eman” Ruiz a finalisa bisando.

E discusion si por uza un rijbewijs como identificacion recientemente a cuminsa ora cu ciudadanonan a cuminsa keha (primordialmente esnan mayor di edad) cu nan no por haci uso di nan rijbewijs ‘temporal’ como forma di identificacion, pasobra esaki ta carece di informacion crucial. E problema pa nan ta, cu aworaki censo no ta sacando cedula tampoco. Como tal nan ta keda sin ID valido pa por uza p.e. pa saca placa. Y hopi di nan no ta uza pasaporte mas.

NoticiaCla.com den e caso aki a acerca minister encarga Arthur Dowers, pa su reaccion. (Lesa e articulo aki) Y ta su reaccion ta loke a sorprende hopi aparentemente. Den seno policial, NoticiaCla.com a compronde cu enberdad e no ta un forma di identificacion legal, pero a wordo tolera tur e añanan aki. E documentonan cu legalmente ta wordo considera como un medio di ID, ta un cedula of un pasaporte. Na Hulanda, NoticiaCla.com a haya un documento cu ta stipula exactamente unda y pakico por uza un rijbewijs como medio di identificacion. No a logra haya esaki ainda pa Aruba.