Dowers: Rijbewijs no ta documento pa identifica bo mes

ORANJESTAD – Un rijbewijs no mester wordo usa como un id oficial. Ni antes ni awor. Asina e minister di husticia Arthur Dowers ta reacciona riba e keho cu tin cu e rijbewijs temporal actual no ta wordo reconoci como un forma di id legal. Hopi ta e kehonan cu ciudadanonan cu a ricibi esun temporal, no por haci transaccionnan cune y esey ta un problema. E mandatario mes momento a admiti cu ta un error di parti di departamento di rijbewijs cu awo tin filanan largo pa hende sea renoba of haya rijbewijs pa prome biaha. E ta spera cu e asunto keda resolve lihe y cu pronto tur hende por haya e servicio cu nan merece.

E mandatario a mustra cu nunca no tabata intencion pa uza e rijbewijs como un id pa transaccionnan. Hendenan a hacie, pasobra e tin cierto informacion ariba cu por uza, pero esey no ta hacie un documento valido. E keho a bin ora cu primordialmente hendenan di edad a cuminsa haci transaccion cu e rijbewijs temporal, y a bin haya sa cu esaki no por. Simplemente pasobra tin falta di informacion balioso riba e rijbewijs temporal, manera firma etc. Y como cu nan no tin sea pasaporte actualisa of un cedula (no ta sacando cedula), nan ta pega. E mandatario no por a bisa pakico no tin cedula pasobra esey no ta su competencia. Pa ley, un cedula of paspoort ta e formanan oficial di identificacion, y no rijbewijs. Un rijbewijs de hecho ta un 'rij' document, un paspoort un 'reis' document y un cedula (id) ta un 'identiteisbewijs'. Sinembargo a tolera e uso di rijbewijs pa id den pasado. Na Hulanda rijbewijs ta wordo permiti pa cierto asuntonan solamente como medio di identificacion, pero en general, esaki e no ta wordo considera un forma pa identifica bo mes cune. 

E la admiti cu e fayo tabata uno administrativo cu a pone cu enves di un grupo chikito, a bin resulta cu esnan cu mester haya un documento asina, tabata mucho mas grandi cu a spera. Como tal e mandatario a duna orden pa resolve e situacion y pone sea mas polis y dedica asina mas tempo na e problema pa por resolve esaki mas lihe ainda. “Si mester, keda habri te 8’or di anochi” e mandatario a sigui bisa.

E hecho cu a habri siman pasa dialuna, pa dos dia despues bolbe sera, tabata un ‘error’. “Esaki tabata basa riba un misunderstanding” e mandatario a sigura NoticiaCla.com mesora. Como tal a resolve e asunto aki, y enberdad mesora a sali un aviso cu contrario na e informacion anterior, a dicidi pa mantene e servicio di rijbewijs habri atrobe pa por sigui duna servicio.

E intencion ta cu pa den curso di aña nobo, keda cla cu e tramite pa asina Aruba mes por saca su propio rijbewijs, y asina cuminsa duna servicio miho. E problema segun Dowers ta cu semper tabatin un bon documento pero un servicio malo pasobra e documento mester a wordo traha den exterior, cu e tardansa necesario.