ATIA: Introducion di parkeermeters tin efecto negativo pa comercio

ORANJESTAD - Tanten cu no tin parkeerplaats adecua pa henter pueblo, e proyecto di AruParking no tin ningun sentido. Esaki ta e pensamento general di e gremio comercial mas grandi di Aruba, Aruba Trade and Industry Association. Den un comunicado emiti riba e topico di parkeermeters, e gremio ta mustra su desaprobacion pa e forma con esaki ta wordo presenta. Segun su director Igmar Reyes, ATIA ta preocupa cu esaki lo por tin mas impacto negativo pa comercio den Caya Grandi. E ta referi na e Proyecto di AruParking y e tarea di parkeerwachters pa boet chauffeurnan mal staciona y/of klem wheel di nan vehiculo.

LUGAR PA PARKEER

Segun Reyes, miembronan di ATIA ta di opinion cu promocion di Caya Grandi cu e obhetivo pa atrae hendenan pa bini ta algo positivo, pero e pregunta cardinal ta keda: na unda lo por parkeer? Sigur mirando cu comercio den Caya Grandi a y ainda ta sufriendo door di stagnacion di trafico door di e reciente renobacionnan y inicio di e tram. Pa comercio e proyecto AruParking ta un di e ultimo clabonan.

EFECTO RIBA COMERCIO

ATIA ta mustra cu e proyecto aki lo por ta otro motibo pa hendenan no bin, y si posiblemente clientenan bin, nan ta core e riesgo di haya boet y/of un klem na wheel di nan vehiculo. E preocupacion di comercio ta cu esaki lo stop clientenan (y nan famianan) di bin den Caya Grandi. Sigur mirando e otro alternativanan manera shopping malls existente cu parkinglot safe y ordena.

CONSECUENCIA FINANCIERO

E Proyecto di AruParkinglo por conduci na reduccion significante di ganashi di sales y un reduccion di import duty revenue relaciona na menos actividad economico di retailers. Un otro consecuencia financiero cu ATIA ta premira ta cu introduccion di parkeermeters probablemente lo bay contribui na mas gasto pa haci negoshi mirando cu comercio lo ta esun cu lo mester bay paga p’e tarifanan di parkeer pa su clientenan como un facilitacion / servicio, pues un gasto adicional innecesario.

CORSOU

Tuma Corsou como ehempel caminda e mesun proyecto di parkeermeters a wordo introduci y cu a resulta contraproductico. Hendenan pa via di e parkeermeters no ta yega Punda ni Otrabanda mas. Laga nos siña di esaki y no comete e mesun eror.

SUBSIDIO

No por keda sin menciona cu tur e parkeerwachters lo mester wordo subsidia di un of otro manera door di gobierno, na final di dia ta comercio y pueblo en general ta paga p’e. ATIA ta haya remarcabel cu netamente den tempo di crisis caminda gobierno tin e obligacion pa baha gasto di personal, ta opta pa mantene esaki (of te hasta hisa gasto di personal) door di crea un proyecto asina, siendo e obhetivo di gobierno ta pa yega pronto na un Balanced Budget. Prioridad por wordo duna na otro cosnan manera inverti den parkinglot y inverti den seguridad den Caya Grandi.

ALTERNATIVA

ATIA ta opina cu mester di multi-level parkinglots urgentemente, uno cu ta bon segura na un prijs cu tur hende por afford. Pues e placa inverti den e Proyecto di AruParking por wordo miho inverti den parkinglot haciendo asina Caya Grandi na Oranjestad mas agradabel y accesibel. Despues cu multi-level parkinglots wordo realisa, por opta como siguiente paso pa introduci parkeermeters y parkeerwachters. Tanten cu no tin parkeerplaats adecua pa henter pueblo, e proyecto di AruParking no tin ningun sentido.