Elias: No por a logra haya artista ‘nobo’ pa bin CNSJ e aña aki

Elias: No por a logra haya artista ‘nobo’ pa bin CNSJ e aña aki

Posted on 02/18/2020 2:29 pm AST | Updated on 02/18/2020 3:03 pm AST

WILLEMSTAD – Tabata na augustus di 2017 caba cu e creador di e concepto di North Sea Jazz Festival pa Corsou, Gregory Elias a indica na noticiacla.com cu ‘e vijver pa artista’ a bira chikito. Esey kier men cu tabata dificil pa haya artista nobo’. E aña ey a skip e festival, y a sigui bek na 2018. E aña aki atrobe, parse cu e vijver a bira bashi, cu mester a bolbe anuncia cancelacion di e festival pa 2020. Y no ta sigur cu e lo sigui na 2021. E portal aki a acerca Elias pa haya sa mas tras di e cancelacion di e aña aki. 

ARTISTA NOBO

Segun Elias, ta for di januari 2020 tabata bisto cu lo no por a sigura continuacion di e festival e aña aki. Elias ta esun responsabel pa e festival, y a crea e concepto pa Corsou 10 aña pasa, for di esun di Hulanda North Sea Jazz Festival. Hunto cu Mojo, su fundacion Bon Intencion tin 9 aña organizando e festival di taya internacional aki. Pa loke ta 2020, segun Elias, no por a sigura dos artista principal ‘nobo’ pa cera e festival. E ta yama nan e ‘main bout’. Y esey ta cu for di September 2019 a cuminsa busca artistanan nobo, esta manera e festival di e aña anterior caba. 

ARTISTANAN A CABA?

Mientras cu e ta un comentario comprendibel, hende por ta cuestiona con por ta posibel cu di tur artista cu tin, no tin sikiera un artista nobo cu no por bin Corsou pa e festival aki sigui. Elias ta contesta cu e kier pa esnan cu tin e comentario ey, nombra un artista grandi, cu no a bin Corsou ainda, fuera di esunan cu falta cu ta buscando. 

CAMBIA E PERIODO

Si e festival (CNSJ) su fechanan no ta ‘apropia’ pa e artistanan siendo un temporada perfecto pa Corsou, pa cambia esaki pa un otro fecha, no ta un opcion segun Elias. “Pa Corsou, esey a wordo papia hopi bez. Ta tin di tuma e decision cu sea ta hacie den e temporada (di) mei, (of)  juni cu e touring schema di e artistanan ta bezig, of ta hacie delaster parti di aña, cu ta October, November December”. Pero e temporada cu a scohe cu ta e Laborday weekend na Merca, a hacie pasobra e temporada ey ta un low low season di Corsou. “Ta pesey a hacie. Pa atrae hende di afo” Elias a bisa. E ta bisa cu e la ripiti su mes sigur 10 aña tras di otro cu e siguiente mensahe. “Tanto e Arubianonan cu ta bin aki nan, e Surnameñonan, Colombianonan, hende di afo cu ta bin di afo. Pero sigur e fan base cu nos tin na Aruba, ta eseynan ta e cosnan cu ta atrae e turista cu ta bin Corsou pa e temporada ey tin algo ta pasando pa e economia di e isla di Corsou. Ta pesey nos ta hacie” Elias a bisa. 

RIPITI ARTISTA

Mientras cu den pasado a ripiti varios artista den e festival, esaki no ta keda un opcion ‘djis pa e festival por sigui. “Bo ta purba haci bo best pa busca semper e artistanan cu no a bin ainda” Elias ta sigui bisa. Pero pa hinca e asunto den contexto, e ta usa e festival original esta North Sea Jazz na Hulanda. Eynan e aña aki, artistanan cu ta bin ta artistanan cu a bin Corsou caba. Nan artistanan principal e aña aki (na juli) ta Lionel Richie, Dionne Ross y Alicia Keys. “Mi bin cu nan despues di 4 pa 5 aña atrobe como main bout, mi ta kere cu e hendenan di afo y local por bay bisa cu pa nan bin Corsou bin wak Lionel Richie etc atrobe, no ta bin”. E ta considera e situacion un catch 22, osea bo ta ‘between a rock and a hard place’. Pues tin nan, por haya nan, pero si bo haya nan, nan lo no ta exitoso. Esey no kier men cu Elias lo trece otro artistanan bek. E ta haci mencion di e.o. John Legend cu sigur e lo trece bek.  Pa loke ta ‘mala lenga cu ta bisa cu tin otro cos su tras, pa cual e festival no ta sigui, Elias tabatin un reaccion simple. “Unico cos cu bo tin cu haci, ta no reageer riba e cosnan ey. Si nan tin nan ideanan, semper nos tin un cos pa bisa. Con bon cu e por ta” Elias a finalisa bisando. 

  • Powered by SETAR