Elias: Vijver pa pisca artistanan pa CNSJ birando mas chikito

WILLEMSTAD - Pa hopi cu a sigui y ta bishita Curacao North Sea Jazz Festival pa 6 aña, e line up di e aña aki ta mustra diferente. Artistanan menos comercial, menos conoci, si compare cu añanan anterior. Hopi ta kere cu tin un motibo pa esaki. E propietario di e evento local, comerciante Gregory Elias no ta kere esaki si. E ta admiti si cu e vijver den cual tin cu pisca e artistanan, ta birando mas chikito. Den un entrevista exclusivo cu NoticiaCla.com, Elias ta duna splicacion di e line up di e aña aki, cu segun e, ta varia manera tur aña. 

CON PA SCOHE ARTISTA

"Bo tin cu cuminsa cu envolvi hubentud den e cos aki"  Elias ta cuminsa na bisa. E ta referi na Chris Brown y Jay Balvin cu ta wordo considera musica pa hoben (20 pa 30 aña). "Nan (Brown y Balvin) ta hopi famoso. Y bo tin cu pone rond di nan, sorto di hendenan cu bo ta kere cu tambe ta cuadra cu e hubentud". Den caso di Bruno Mars, cu casualmente ta jong, tur hende te hasta di edad, tur hende a gust'e. "Ta bin acerca, cu den 6 aña a bin un 132 artista Corsou. Mitar di nan ta monster act. Loke tin cu wak bon, ta cu si bo ripiti un artista, hende no ta gusta. Contrario na Merca y Hulanda unda cu cada dos aña e mesun artista ta bin" Elias ta sigui bisa. E ta considera Juan Luis Guerra sinembargo, un excepcion. "Bo buta Juan Luis Guerra tur dia, tur hende ta bin, pasobra e homber ta un genio. E ta asina productivo cu cada dos aña e tin un cos nobo" Elias ta sigui splica. E ta conciente cu e vijver den cual bo tin cu pisca artista, ta birando dia pa dia mas chikito. "Bo mester tin suerte cu cada aña, e artista cu ami kier bin, por. Te ainda mi tabatin suerte". 

LENNY KRAVITZ Y TOM JONES

Den caso di un Lenny Kravitz p.e., ta pasobra e ta cuminsa un gira pa lansa su produccion nobo, el a ofrece pa bin Corsou. Un artista cu tin 8 pa 9 aña sin presenta. "Hende mester compronde cu pa bin Corsou, ta un 'one of'. Nan no ta bin como parti di un gira" Elias ta bisa, splicando cu e artista hopi biaha tin cu desvia y ta bin specialmente te Corsou pa presenta. Esey ta haci e situacion mucho mas caro, cu si nan tabata parti di un gira.  Mientras cu ningun hende ta papia di Tom Jones, segun Elias ora cu bo mira su nivel, na su edad, bo ta spanta. "Esey ta mi generacion. Mi a nace cu Tom Jones. Bo ta spanta cu e homber ta mas miho cu ora cu e tabata jong" Elias a sigui bisa. Pero bisando esey, bo mester sa si kico bo ta sigui y no haci ken cu ta. 

ARTISTANAN CRITICO OF CARO?

Un di e aspectonan tambe ta sea e placa cu ta pidi pa presentacion y of e criteria cu nan ta pone pa nan por presenta un caminda. Pa Elias, no ta bay pa unda cu nan ta bin. Nan tin un prijs plaatje unda cu nan bay. Loke si ta haci nan mas barata ta si nan ta den un gira of no. "Den un gira nan ta bal mitar di loke nan ta bal normalmente. Nan ta na Corsou dos biaha mas caro cu ora cu nan ta den un gira". Y nan (Artistanan) no tin problema pa presenta dilanti un cierto cantidad di publico, y no tin exigencia pisa. Y den e caso di Elias, no ta e placa sino e exigencia of availability. A haci mencion di e banda Level 42 cu ta bin te for di Inglatera. "Nan a reageer mesora. Nan a tende asina hopi di e cos aki (CNSJ) y nan a bisa cu nan tin cu bin wak".