Gobierno no a duna permiso pa retira trahadonan di CITGO

ORANJESTAD – Gobierno (ainda) no a otorga ningun permiso pa retiro di e trahadonan di CITGO Aruba Refinery. Por lo menos, e mandatario encarga cu Labor, Glenbert Croes te cu dialuna mainta, no tabata na altura di dicho otorgamento. Loke tambe minister di Labor Glenbert Croes a confirma pa noticiacla.com dialuna durante un conferencia di prensa, ta cu CAR no a haci ningun peticion pa retiro di e trahadonan. Atrobe, te cu awe mainta e mandatario no tabata na altura.  Y segun e mandatario, tanten cu no tin un acuerdo husto entre e trahadonan y e compania, e compania no ta haya permiso pa retira e trahadonan. Ademas, lo haci tur cos posibel pa frustra un eventual ‘salida di Aruba’, di e gerencia y su directiva tanten cu nada no ta regla. Tur esaki basa riba un articulo cu e portal aki a saca diadomingo, indicando cu CITGO su gerencia 'lo tin intencion di baha na awa' sin regla cosnan pa trahadonan.

SOSTENE E TRAHADONAN

E mandatario a bisa cu gobierno ta para banda di e trahadonan y kier pa nan haya un trato husto. A ripiti e situacion cu a informa e compania multinacional cu a bin e prohibicion pa retira hende sin mas. E tempo ey, e mandatario a usa e autoridad cu e tin pa duna un instruccion na Departamento di labor, cu no ta duna permiso di retiro na CITGO. “E instruccion ey a keda vigente” Croes a sigura e portal aki awe mainta. A reitera e decision ey recientemente. “Por lo cual ontslag vergunning lo no wordo duna na CITGO” Croes a bisa. A indica cu nos leynan laboral ta hopi cla, kico mester haci como dunado di trabou den un fase asina. Y ora cu ta menasa derecho laboral di trahadonan, e mandatario tin e autoridad pa salvaguardia e derecho di e trahadonan.